Yoigo rexistra un envío masivo de SMS pola victoria do Barça
xoves, 28 de maio do 2009
Os medios impresos e dixitais de todo o
país non falan hoxe de outra cousa que non sexa a victoria do F.C.Barcelona
ante o Manchester United na final da Liga de Campións de Europa disputada onte:
“Barça campión”, “Barça mítico”, “Barça
emperador do fútbol europeo”, “O mellor Barça de tódolos tempos”… mesmo a
prensa estadounidense, da man dos xornais The Washington Post e The
New York Times (na súa versión en liña), destacaron o triunfo do equipo que
dirixe Pep Guardiola na súa primeira páxina, algo que non soe ser habitual xa
que raramente deixan ver novas deportivas na súa portada, e moito menos con fotografía
incluída, como sucedeu nesta ocasión.
E é que o triplete acadado polo equipo
catalán non deixou a ninguén impasible e só hai que ver as cifras de SMS
enviados a través da rede de Yoigo, con bastantes menos usuarios que Vodafone
ou Movistar (as principais operadoras de telefonía do noso país), para darnos
conta da trascendencia deste evento a nivel nacional e internacional.
Segundo vén de anunciar hoxe a devandita
operadora, a victoria do FC Barcelona onte á noite “desatou a euforia e os SMS convertéronse na maneira estrela de
felicitarse entre todos os afeccionados”.
Deste xeito, dende as 20:00 ata as 23:00
horas de onte, o número de SMS enviados na rede de Yoigo incrementouse nun
39,63 por cento respecto ás mesmas horas do mércores da pasada semana.
En total, ao longo de todo o día, os
usuarios de Yoigo mandaron un 11,05 por cento máis de mensaxes que o mércores
pasado, unhas cifras que nos recordan citas tan sinaladas no calendario das
operadoras como Fin de ano ou Aninovo, cando as liñas se colapsan
inevitablemente por exceso de envíos.