Windows Mobile gaña adeptos fronte a Palm OS

Por segundo ano consecutivo, Handango (unha das poucas firmas que ofrece aplicacións para as cinco plataformas máis importantes do mundo: BlackBerry, Palm OS, Windows Mobile e Symbian), vén de publicar os resultados do Yardstick, o seu informe anual sobre vendas de software para dispositivos móbiles, no que se analizan as variedades de aplicacións das principais plataformas móbiles.
A evolución das vendas anuais dos principais distribuidores de programas amosa que os desenvolvedores están a optar de cheo polos teléfonos avanzados con Windows Mobile e que Palm OS perde presenza no mercado. Comparando os datos actuais cos do ano anterior pódese apreciar que, mentres que o número de novos títulos fica constante, a cantidade de empresas que se incorporan ó mercado do software móbil diminuíu até un 38 por cento menos ca en 2005.
Segundo Hardango, os usuarios do modelo Treo 650 de Palm son os que máis software mercaron ó longo do pasado ano, tanto por unidades como por volume de ingresos, malia o incremento do prezo medio de venda dos programas, que se sitúa xa nos 21,16 dólares.
No referente á variedade, a situación é moi distinta segundo a plataforma considerada. Así pois, mentres Windows Mobile Smartphone e BlackBerry rexistran os meirandes incrementos relativos ó número de títulos dispoñibles (o 92 e o 81 por cento respectivamente), os programas para Palm OS aportaron un 26 por cento menos de títulos novos ó longo do pasado ano. Deste xeito redúcese a distancia entre a cantidade total de programas dispoñibles para Palm OS respecto de Windows Mobile, aínda que non abonda para que este último se poña á cabeza da listaxe de vendas de software.