Televés comeza en Ourense a súa xira europea, Tour HDTV
luns, 27 de abril do 2009
- Unidade móbil de Televés
Co principal obxectivo de achegarlle a “televisión do futuro” aos técnicos,
distribuidores e profesionais do sector, a compañía compostelá Televes vén de
iniciar o seu Tour HDTV, unha
iniciativa que leva información sobre a televisión de alta definición por toda
Galicia (e toda Europa) nunha unidade móbil dotada de equipos de última
xeración deseñada especificamente para este fin.
A compañía galega levará por todo o
continente o sinal de televisión de alta definición e brindaralle aos técnicos,
profesionais e, en xeral, a toda a poboación interesada, información sobre esta
tecnoloxía de vangarda e as ferramentas necesarias para xestionala.
O Tour
HDTV de Televes desenvolverá a súa primeira fase en España e Portugal ao
longo deste ano e a súa estrea terá lugar mañá, día 28 de abril, en Ourense. A
cidade das Burgas acollerá a xira da televisión do futuro diante do almacén de
material eléctrico e electrónico Ampasa, na Rúa Río Mao, 39, e alí os técnicos
de Televés recibirán aos instaladores e a todos os interesados en achegarse á
tecnoloxía que soporta a televisión en alta definición para presentarlle os
produtos e solucións desenvolvidas pola compañía.
Despois de Ourense, as seguintes paradas
da xira serán as localidades galegas de O Barco de Valdeorras e Pontevedra,
para continuar cun amplo percorrido por Portugal, que dará comezo o vindeiro día
4 de maio en Maia.
A comezos de xuño, o tour voltará ao noso país e logo de pasar polas Illas Canarias,
volverá a Galicia para facer catro paradas: Lugo, Burela, Ferrol e Lalín.
Posteriormente percorrerá as distintas
comunidades españolas e cruzará os Pirineos para pasar por Francia, Alemaña,
Italia, Reino Unido, os países nórdicos e os de Europa do Este.
Unha
iniciatva con seguimento en liña
A xira poderá ser seguida paso a paso
polos internautas, a través da web http://www.hdtv-tour.com/,
na que se atopa toda a información relativa ás datas e lugares previstos para
cada unha das paradas.
Asemade, o sitio contará cun blog
dedicado ás actividades desenvolvidas en cada unha das etapas, que dará conta
das novidades e curiosidades que se vaian dando en cada localidade.
Con esta xira europea, Televes reafirma a
súa “política de proximidade e apoio aos
instaladores e distribuidores”, ao tempo que ratifica a súa “aposta pola alta definición como o formato
da televisión do futuro”.