Telefónica levará Internet por fibra óptica ao polígono de Morás
luns, 13 de xullo do 2009
As empresas do polígono de Morás, situado
na zona empresarial de Arteixo, terá garantizado o servizo de Internet por
fibra óptica se Telefónica cumple finalmente o que anunciou a pasada semana.
Os responsables da operadora nacional
aseguran que “aínda non poden precisar os
prazos” porén garanten que será a fibra óptica a que distribúa os servizos
de telefonía e Internet posto que, engaden, “é
a tecnoloxía con maior calidade”.
A chegada
de Internet a este parque empresarial, que previsiblemente se convertirá
nun dos maiores de Galicia en breve, é unha das mellores novas que lle puideron
dar estes días aos empresarios da zona xa que dende que o proxecto se fixo
oficial, a ubicación e a orografía do polígono era un obstáculo considerable
para a instalación da Rede a un prezo asequible.
As cousas xa comezaron a tornar doutra
cor cando o Programa de Extensión de Acceso á Banda Larga (PEBA) do Ministerio
de Industria incluía á parroquia de Morás nas súas previsións e sinalaba
outubro de 2008 como prazo para a chegada da alta velocidade á comarca. Isto,
que aínda hoxe non se ten cumplido, supuxo unha alegría para os empresarios da
zona, e únese agora á “promesa” de
Telefónica de levar a banda larga ao Polígono industrial por medio da fibra
óptica, unha tecnoloxía que se prevé como a “máis económica” para abastecer de Internet á zona.
O
tempo dirá se finalmente o polígono de Morás, cun emprazamento fundamental para
as empresas de distribución de diferentes produtos, contará con Internet de
alta velocidade para poder competir en igualdade de condicións con outras áreas
industriais.