Telefónica impulsa as xeiras de HackForGood que se celebran esta semana en todo o Estado
luns, 22 de febreiro do 2016
A nova edición das
xuntanzas HackForGood,
impulsadas por Telefónica, promete ser unha das grandes citas TIC da
tempada de eventos relacionados coas novas tecnoloxías nas súas
múltiples facetas. Por que? Pois porque vai xuntar en campus de todo
o ámbito estatal (25, 26 e 27 de febreiro) centos de estudantes e
futuros profesionais da Sociedade da Información que nos agarda, e
tamén porque o van facer (xuntarse) para adquirir coñecemento e
formación e, sobre todo, para traballar a prol dun mundo mellor a
través das novas tecnoloxías. A través das novas tecnoloxías e
cousas concretas como a información masiva (Big Data) ou a
busca de novas aplicacións sociais e solidarias. HackForGood
2016 celébrase de maneira simultánea en 14 sedes coa concorrencia
dun milleiro de estudantes de 20 universidades de toda España,
incluída a de Vigo.
Esta será a cuarta edición do
HackForGood, a segunda consecutiva na que este encontro de
programadores organizado por Telefónica se celebra en Vigo. A
iniciativa está impulsada pola Escola Técnica Superior de
Telecomunicación da Universidade Politécnica de Madrid; a Fundación
Hazloposible e a nova empresa MashmeTV, e conta co apoio da Rede de
Cátedras Telefónica, entre as que se atopa a da Universidade de
Vigo.
O hackaton HackForGood recoñecerá o labor dos
equipos que desenvolvan as mellores aplicacións tecnolóxicas en
Vigo, Madrid, Barcelona, Valencia, Alacante, Murcia, Cidade Real,
Sevilla, Málaga, As Palmas de Gran Canaria, Cáceres, Salamanca,
Valladolid e León. Por estas mesmas datas, como lembraremos,
Telefónica
e a Universidade de Vigo daban a coñecer os galardóns para as
iniciativas galegas Pulsafe, Sanet, Ancianos SOS, GreenScouter e
Espectrofotómetro.
HackForGood é un evento
promovido por Telefónica e organizado xunto á ETSE de
Telecomunicación da Universidade Politécnica de Madrid, a Fundación
HazloPosible e a start-up MashmeTV co apoio da Rede de
Cátedras Telefónica no que centos de Hackers ForGood propoñen
retos e desenvolven solucións para construír un mundo mellor. En
palabras de Teléfonica, a idea é convocar xente positiva e
entusiasta, “con ganas de facer cousas”, co fin de crear
solucións innovadoras para os problemas que aínda ninguén foi quen
de resolver. A operadora engade que en 2016, os retos de HackForGood
virarán ao redor da utilización masiva de datos (Big Data)
para construír aplicacións e servizos que axuden a construír un
mundo mellor.
Os retos poden ser
propostos por calquera organización ONG ou cidadán que detecte un
problema social que poida ser liquidado mediante o uso da tecnoloxía.
Achéganse, para ir preparando o camiño, convites para axilizar o
manexo de datos en situacións de catástrofes, para a xestión de
información dirixida a minimizar riscos en cultivos agrícolas ou
para o seguimento do fluxo de vehículos (que pode coordinarse mellor
a prol do beneficio de todas e todos).
A cita de Vigo
Segundo informa a Uvigo
respecto da cita que se celebra no seu Campus, a primeira parte do
evento, denominada Startups University Day, celebrarase de
maneira simultánea en cada unha das devanditas catorce sedes. Nesta
primeira metade do hackaton presentaranse as mellores
prácticas de emprendemento en cada unha das 20 universidades
participantes. Máis tarde haberá unha presentación global por
videoconferencia con conexión de todas as sedes e, na segunda parte
do evento, os equipos desenvolverán aplicacións e solucións a unha
serie de retos, “valorándose a formación de grupos
multidisciplinares que inclúan todos os perfís precisos para o
desenvolvemento de servizos e aplicacións”, explica a Universidade
de Vigo, que engade que estes perfís corresponden en gran medida a
estudantes de enxeñaría, deseño, informática, socioloxía,
empresas innovadoras, etc.
As aplicacións que o alumnado deseñe
deberán facer fronte aos retos que a organización e calquera outra
persoa propoñan a través da web
do HackForGood.
Entre as mellores aplicacións elixiranse os
equipos gañadores, que se repartirán 12.000 euros en premios para
as mellores ferramentas estatais e catorce premios de 2.000 euros, un
por sede, para as mellores aplicacións locais. Os premios temáticos
consisten en 8.000 euros para os recursos máis salientábeis e con
meirande potencial para afrontar retos relacionados coa educación e
as diversidades motrices e cognitivas así como para aqueles que se
baseen no uso de xogos serios ou que teñan o mellor deseño. Os
premios de continuidade subministrarán formación personalizada,
asesoramento específico e financiamento adicional. Para iso haberá
un premio Think Big local en cada sede HackForGood que consistirá
nunha fin de semana formativa en emprendemento social e a
posibilidade de pasar ao nivel 2 do programa Think Big de Fundación
Telefónica. Entre todos os gañadores locais elixirase o gañador
nacional, que será premiado cun pase directo a este nivel 2 de Think
Big. Por outra banda, os premios Telefónica Open Future–HackForGood
repartirán tres galardóns globais que permiten o uso da rede de
espazos de crowdworking de Open Future e un asesoramento
personalizado que facilite que a idea orixinal deveña nunha nova
empresa.