Spotify anuncia unha plataforma con múltiples posibilidades de acceso á música
xoves, 1 de decembro do 2011
Xa van quedando poucos seareiros da música que
non sexan seareiros, tamén, dalgunha rede ou medio tecnolóxico de difusión ou
distribución musical. Spotify,
consciente diso, vén de mover ficha para xuntar baixo o seu teito a quen anda
baixo outros acubillos. A isto responde o seu anuncio recente de crear unha
plataforma para integrar unha chea de aplicacións até o de agora espalladas
noutros servizos, aplicacións entre as que se inclúe unha da revista Rolling
Stone para permitirnos o acceso ás opinións sobre cada canción e outra de
Last.fm para compartir con outros o que escoitamos.
Segundo se nos conta en medios como El Progreso
reflectindo información de fontes de Spotify (ultimamente un pouco de
capa caída tras apostar por un modelo máis privado), a nova plataforma ten
toda a feitura de ser o comezo de algo. E cando falamos de “algo” falamos de
cousas que poderían non só mudar o noso xeito de acceder á música senón tamén
as estratexias a seguir pola industria.
Segundo apunta a empresa, o novo servizo pon de manifesto a intención da
compañía de contar cos grandes do sector, traballando xuntos para “achegar aos seareiros os seus artistas
favoritos e experiencias musicais incribles”. A plataforma, amais do
devandito, incluiría unha ferramenta de SongKick para posibilitar a lectura das
letras das cancións que se están a reproducir, ou un servizo de TuneWiki para
darnos conta das vindeiras actividades que teñen preparadas aqueles músicos que
poñamos nos altofalantes.