R suspende en atención ao cliente e asistencia técnica segundo un estudo de ADECES
martes, 22 de setembro do 2015
Tras unha longa traxectoria cunha boa percepción por parte
do público, un estudo
da Asociación Pro Dereitos Civís, Económicos e Sociais (ADECES) sobre a
atención ao cliente e a asistencia técnica dos operadores de telecomunicacións
avala un suspenso por parte de R, compañía que iría na liña do resto de
operadoras, que de xeito xeral estarían a acusar unha caída na calidade da atención
ao cliente, que no caso de compañías como Orange e Jazztel sería especialmente
acusada, chegando a unhas notas cualificada spor ADECES como “extremadamente
baixas”.
- R quedaría por debaixo da media en valoración global de atención ao cliente
Na valoración global da atención ao cliente o VIII Estudo de Atención ao Cliente dos Operadores de Telecomunicacións outorga unha puntuación
de 6,13 sobre 10 a Movistar, operador que confirma o liderado neste aspecto,
seguido por Ono (5,40), Telecable (5,38) e Euskaltel (5,14), mentres suspenden
Vodafone (4,97), R (4,96), Jazztel (4,36) e Orange (4,05).
Se entramos na valoración do Servizo de Atención Técnica (SAT) sorprenden as
baixísimas notas de Orange (3,60) e Jazztel (3,94), volvendo a suspender R
(4,94), mentres que Movistar e Ono volven ser as compañías con mellores
puntuación (6,57 e 5,51 respectivamente). Un detalle a salientar é que Movistar
é o único dos operadores analizados que envía un técnico a domicilio no 100%
das incidencias pendentes, en contraste co ridículo 12,5% de Orange.
- De forma xeral as compañías dan unha mala información sobre os compromisos de permanencia e as penalizacións
O Servizo de Atención Comercial (SAC) suspende na media dos operadores,
volvendo a ser Movistar e Ono os que se salvan da queima cunhas puntuacións de
5,63 e 5,03 respectivamente, mentres que R sería a peor das oito compañías
avaliadas cun 4,03. Neste aspecto sorprende ver como os peores operadores son
Orange e R, que fan esperar aos seus clientes ao teléfono máis de 200 segundos,
cando a media está en 60 segundos.
R tamén queda en mala situación con só un 49% de teleoperadores que se
identifican completamente (mentres que os de Movistar e Telecable superan o
70%); e tamén alarma ver que sobre a información sobre o compromiso de
permanencia a media caería até o 49%, pero no caso de R sería un ridículo 4%
(moi lonxe do seguinte operador, Orange, co 24%). Cómpre destacar que a información
sobre penalizacións tamén é moi deficiente, cun tímido 54% de casos nos que
informa Movistar, mentres que o resto non chegan nin a metade dos casos e,
Vodafone, Telecable, Euskaltel e R non informarían nin unha soa vez segundo
denuncia ADECES apoiándose en datos dun total de 1.332 chamadas.
- R sería o operador co peor SAC de todos os analizados