R anima aos seus clientes a achegar dúbidas e preguntas a través do chat
venres, 31 de maio do 2013
A operadora galega R anunciou este xoves que os
clientes que así o desexen poden comunicarse coa empresa, facer todo
tipo de consultas sobre o servizo ofrecido ou a factura, a través da
súa canle de chat (que complementaría ás xa dispoñíbeis do
teléfono, o correo electrónico, as redes sociais ou a propia web de
clientes). A
idea da compañía galega é achegar máis axilidade nas
comunicacións e non deixar a ninguén fóra das mesmas por
razóns de tendencias e gustos (hai que ten atopado no chat o máis
alto chanzo da escada da comunicación humana). Ao tempo, búscase
manter o compoñente habitual de “proximidade e calidade na
atención”, a xuízo de R, “unha das marcas da casa”.
Para ir dándolle uso a este servizo e quentar
a R coas nosas cousas só temos que ir á web
de clientes e dentro da sección
de fala con R, teremos un acceso directo á ferramenta de
comunicación. Asemade, disporemos dunha porta aberta ao chat nas
seccións os meus servizos, facturas e trámites. As
razóns disto? Pois basicamente responden a que esas cuestións
adoitan ser as que máis dúbidas xeran. Para resolver cuestións por
esta canle, informa R, atenderanos un operador de xeito directo,
tentando botarnos unha man no que precisemos e sen necesidade de que
lle deamos os nosos datos. O horario de atención deste servizo é de
10 da mañá a 10 da noite.