Os pros e contras do uso das redes sociais na educación quedaron ao descuberto en Vigo
venres, 29 de xuño do 2012
O
pasado xoves, 28 de xuño, celebrouse na Escola de Enxeñaría de
Telecomunicación de Vigo a Xornada
de Innovación Educativa 2012, cuxa
sesión inaugural estivo a cargo do xornalista e docente Ernest
Sotomayor, un profesional con máis de 35 anos de experiencia como
reporteiro e editor en Estados Unidos que expuxo
a importancia que acadaron as redes sociais na educación superior,
ata o punto de que, segundo afirmou, “o
nivel tecnolóxico dunha institución académica é un factor que ata
o 88% dos estadounidenses recoñece ter en conta á hora de escoller
universidade”.
No
seu relatorio, Sotomayor fixo unha aproximación ao uso que se lle
está a dar ás redes sociais na contorna docente, afondando nos seus
beneficios e prexuízos, e neste senso sinalou a importancia que os
social
media
acadan na actualidade, ata o punto de que entre 23 e 25 millóns de
españois empregan con frecuencia as redes sociais, e que dese total
“unha
das porcentaxes de uso máis elevada corresponde á franxa de idade
na que se sitúan os estudantes que están na universidade ou que
acaban de rematar os seus estudos superiores”,
precisou.
A
xornada contou, asemade, coa participación de docentes galegos,
españois e portugueses, e serviu como punto de encontro e
intercambio de experiencias entres estes e o alumnado, ao tempo que
se fomentou a reflexión e a investigación sobre os cambios
pedagóxicos que as innovacións educativas están a producir.
Neste
senso, Sotomayor afirmou que “o
desenvolvemento das habilidades tecnolóxicas é crítica para o
futuro”,
e indicou que “a
formación é o máis importante”,
referíndose a que é necesario mellorar a formación tecnolóxica
tanto do alumnado como do profesorado, para poñelas á disposición
da materia a impartir.