Os encontros virtuais da USC co seu futuro alumnado superaron as 20.000 visitas
luns, 13 de abril do 2020
- Un participante nos encontros virtuais da USC nunha imaxe de Santi Alvite
A
iniciativa tecnolóxica para salvar os atrancos do peche ao público
das portas da USC e poder, malia o Estado de Alarma, presentar os
estudos da Universidade de Santiago ante o futuro alumnado saldouse
cun notábel éxito de participación. Segundo
informa a institución os encontros virtuais coas vindeiras alumnas e
alumnos de ensino medio rexistraron preto de 20.000 visitas durante
as dúas primeiras xornadas, o 6 e o 7 de abril no
pioneiro espazo web especificamente habilitado pola USC para
“sortear a actual situación de confinamento”.
O
número de visitas ás ligazóns específicas dos centros emprazados
en Santiago sitúase arredor das 12.500 nestas dúas xornadas, unha
cifra á que se suma as máis de 3.000 no caso do Campus de Lugo. A
estas estatísticas cómpre engadir máis de 2.700 accesos a outros
servizos xerais da USC, tales como Cultura, Deportes, Participación
e Integración Universitaria, Servizo de Residencias, Orientación
Laboral, Normalización Lingüística...
Por
certo que amais de amosar a grella de títulos e grao impartidos pola
USC nas distintas facultades e escolas universitarias, a bitácora
virtual da Universidade de Santiago, actúa como escaparate no
que as persoas usuarias poden, en palabras da Universidade, “coñecer
de primeira man outra información universitaria de interese relativa
a instalacións, equipamentos científicos e tecnolóxicos e demais
servizos que a USC pon a disposición da comunidade universitaria e
do conxunto da sociedade”.
A
alta participación rexistrada nestes encontros proba que “a USC
esperta un gran interese na sociedade na que se asenta”, afirma
Celso Rodríguez, coordinador do programa A Ponte entre o Ensino
Medio e a USC, quen tamén fixo fincapé nas múltiples posibilidades
de interactividade que ofrece esta nova forma ideada pola USC para
achegarse ao alumnado de ensino medio. De feito, unha vez dentro da
web dos encontros virtuais na Zona USC, as persoas usuarias tiveron a
oportunidade de participar en obradoiros, videoconferencias
específicas para cada título, chats, concursos, foros con
estudantes universitarios e retos científicos deseñados para
orientar a súa aterraxe universitaria. A mocidade preuniversitaria
puido facer uso destas prestacións a demanda, en función das
quendas horarias establecidas polos docentes de cada titulación que
teñen encomendada a tarefa de interactuar e dar resposta ás
cuestións e consultas formuladas polos usuarios interesados.