OperGal pide á Xunta que confíe en empresas galegas para levar a Internet ao rural

As empresas que forman parte de OperGal, a Asociación de Operadores Galegos de Redes Sen Fíos de Banda Larga, convocaron esta mañá aos medios de comunicación en Santiago de Compostela para dar a coñecer que a subvención duns 15 millóns de euros que a Xunta outorgará dentro do Plan Director de Banda Larga para achegar a Rede ao rural, non recaeu aínda en Telefónica como publicou parte da prensa, senón que a compañía integrante en OperGal, Intermax, continúa na carreira por facerse con esta axuda que pode supor un importante pulo ás compañías galegas que ofrecen servizos de banda larga sen fíos.
Javier Mouriño, director xeral de Intermax, asegurou que están a solucionar certos erros de forma na documentación que presentaran ante a Xunta para facerse coa devandita subvención, polo que agora dende OperGal piden que a Administración confíe en compañías galegas para este proxecto, tanto polo beneficio que suporá para os cidadáns galegos a través dos servizos de telecomunicacións que poderán ofertar como polo emprego que xerará na terra.

Roberto Valverde pediu obxectividade na resolución das axudas para levar a banda ancha ao rural galego

Roberto Valverde, presidente de OperGal e xerente de Minotec, pediu que, cando menos, a valoración dos proxectos de Telefónica e Intermax sexa obxectiva, pois confía en que os técnicos entendan que a solución proposta por Telefónica (baseada na telefonía 3G) é sumamente inferior á que poden achegar dende as empresas da Asociación, e precisamente para reforzar ese argumento publicaron nas últimas semanas un informe que sostiña que as comunicacións baseadas en tecnoloxías Wi-Fi eran ideais para levar a Internet ao noso rural, de aí que na rolda de prensa desta mañá estivese presente o enxeñeiro Fernando Fontán, da Escola Superior de Enxeñeiros de Telecomunicacións da Universidade de Vigo, quen confirmou a validez da proposta tecnolóxica que fan os operadores galegos.

Isidro Barco destacou a importancia de xerar emprego en Galicia apostando por compañías locais para loitar contra a fenda dixital no rural

Á subvención tamén concorrera outra compañía de OperGal, Tripla, da que o seu xerente, Isidro Barco, insistiu na necesidade de que a subvención da Xunta recaia en compañías galegas, para deixar a riqueza e a creación de emprego no país (falan duns 200 empregos directos e uns 2.000 indirectos).
Durante a presentación tamén deixaron claro que a proposta de Telefónica é moi inferior tecnoloxicamente á de Intermax (pois esta última non se limita a dar conexións á Rede mediante 3G, senón que está aberta a velocidades moito máis elevadas que permiten ata ofrecer servizos de televisión sobre IP, para o que tamén queren colaborar con outras compañías galegas como Blusens). Os presentes tamén manifestaron a súa desconfianza con Telefónica, por ser a compañía na que recaeron subvencións anteriores para levar a Rede ao noso rural, quedando así en evidencia a súa competencia ao respecto (moitos dos actuais clientes das compañías de OperGal son en moitos casos ex usuarios de comunicacións 3G ou están en zonas ás que Telefónica tería que ter levado a cobertura da Rede no pasado).
Actualmente as empresas que conforman OperGal facturan uns 5 millóns de euros ao ano, xeran 50 empregos directos e dan servizo a uns 11.000 usuarios en 120 concellos galegos.