O CITIC traballa nun proxecto para entender a fondo o COVID-19 e as súas mutacións
xoves, 9 de abril do 2020
O
Centro de Investigación TIC da UDC, o CITIC, está a pleno
rendemento botando man das posibilidades do traballo a distancia,
plenamente coordinado, para achegar repostas específicas e claras na
loita contra o COVID-19. Segundo informaron fontes do centro esta
mesma semana, un
grupo de investigadores da área de Ciencia e Enxeñaría de Datos
dirixido por Susana Ladra e José Paramá atópase desenvolvendo un
proxecto para a caracterización de “cuasiespecies virais do
SARS-CoV-2”. A investigación é unha parte central da tese
doutoral do investigador Borja Freire.
Segundo
informan dende o CITIC para poñernos en contexto sobre a natureza do
traballo despregado, as “cuasiespecies” son as diferentes cepas
que se atopan nunha persoa infectada, “unha mestura heteroxénea de
xenomas moi relacionados entre si, cunha semellanza superior ao 98
%”. Así, “co obxectivo de entender o virus e as súas mutacións,
contribuíndo á súa caracterización”, esta iniciativa estuda o
xenoma do virus, comparando diferentes xenomas obtidos de diferentes
mostras para ver onde se transforma o virus e onde non se transforma
nunca, é dicir, que é o que é esencial para o virus e que é o que
non cambia. “Isto permitirá atopar tratamentos e vacinas contra o
virus”, explican.
Desde
o CITIC, no marco dun proxecto europeo que liderou o centro, e en
colaboración coa Universidade de Helsinqui, desenvolveuse un
software que aborda o problema de ensamblar as “cuasiespecies
virais”, que permite caracterizar as “cuasiespecies presentes
nunha mostra a partir de datos de secuenciado”. O centro coruñés
fai saber que os resultados experimentais “mostran que este
software é preciso e rápido, algo que non se consegue
simultaneamente por outros métodos existentes na actualidade”.
Ademais, permite recuperar “cuasiespecies de baixa abundancia”,
que a miúdo se pasan por alto outras técnicas.