Microsoft comeza a vender discos duros de 250 Gb para a Xbox 360

Para ter un prezo competitivo moitas consolas Xbox 360 vendéronse sen disco duro ou cun disco duro de só 20 Gb, o que resulta suficiente simplemente para almacenar contidos descargables dos últimos xogos e datos dos xogadores, pero coa proliferación de contidos en descarga, que van dende películas ata xogos de Xbox 360 completos, apareceu a necesidade dun disco duro maior, polo que Microsoft comezou a vender unidades soltas de 250 Gb a un prezo de 129,99 dólares nos EE.UU. e que tamén están dispoñibles noutros países (descoñecéndose polo momento a data na que chegarán a comercializarse en España).
Pese a que hai rumores da posibilidade de empregar discos externos tradicionais para ampliar a capacidade de almacenamento da Xbox 360 a través dunha actualización do seu Dashboard que sairía en primavera, a posibilidade de adquirir un disco duro oficial de grande tamaño responde a unha demanda do público, e de seguro que o agradecerán os usuarios que descarguen moitos contidos ou incluso os que queiran instalar os seus xogos no disco para axilizar a súa carga.