ITG presenta en Expodrónica unha revolucionaria unidade móbil para operacións con drons
luns, 25 de setembro do 2023
O
Instituto Tecnolóxico de Galicia presentou este 25 de setembro na
feira Expodrónica, que se
celebra até o xoves 28 no IFEMA de Madrid, a que sería, en palabras do ITG, a unidade
móbil exclusiva para operacións con vehículos aéreos non
tripulados “máis completa e avanzada de España”. O ITG deu a
coñecer o seu enxeño no marco da Airspace Integration Wee. A
unidade Drone Operations Control Advance Unit (DOC) de ITG
permite despregar todo tipo de operacións con vehículos en calquera
localización, aínda en áreas sen cobertura. De feito, explica o
centro tecnolóxico galego, “podería crear unha rede de
comunicacións propia, de forma rápida e eficiente, destacando a
xestión e monitoraxe do tráfico de sistemas aéreos non tripulados
(U-space) no espazo aéreo próximo”.
Así,
este centro de operacións móbil para drons deseñado por ITG, conta
co equipamento necesario para levar a cabo operacións en remoto,
facilitando todo tipo de actuacións con sistemas aéreos non
tripulados ao ofrecer “unha gran flexibilidade e capacidade de
adaptación ás diferentes contornas reais e conceptos de operación
a validar”, explica o instituto engadindo, que se trata dun
vehículo de 6x2,8m adaptado como centro de operacións e oficina
móbil que contén os sistemas necesarios para unha despregadura
rápida.
En
palabras de Analía López Fidalgo, directora da División de
Sistemas Aéreos Non Tripulados de ITG, “a nosa unidade móbil
permite dar mellor soporte tanto aos nosos clientes como ás nosas
actividades de investigación e experimentación, coa despregadura de
probas de campo moito máis rápidas e eficaces como as que levamos a
cabo en Estremadura, Andalucía, Cataluña ou Madrid”.
O
centro tecnolóxico galego sinala que o porto de operacións avanzado
é “un vehículo singular e diferencial que dispón do equipamento
tecnolóxico necesario para o control e operación de drons en
diferentes contextos e escenarios, equipamento no que se inclúen
sistemas de control de terra de UAS, equipos de radiocomunicacións,
equipos informáticos, sistemas de vídeo-vixilancia, equipos
multimedia e monitoraxe meteorolóxica en tempo real”.
Ademais,
o ITG explica que o deseño interior e as instalacións permiten a
aplicación ou incorporación de novo equipamento tecnolóxico que
poida ser necesario no futuro. En concreto, a unidade móbil de
operacións con drons de ITG dispón un sistema de enerxía autónomo
que posibilita o uso de todos os sistemas aproximadamente durante
unha xornada de traballo sen necesidade de conexión á rede de
subministro eléctrico.
Tamén
conta con sistema de comunicacións 5G, radiocomunicacións, sistema
audiovisual e unha estación meteorolóxica. No seu interior destaca
a estación de control de terra (GCS) formada por dous postos de
operación (voo e misión), un posto de taller (asistencia técnica),
ademais dun posto adicional para a xestión dos sistemas audiovisuais
(con capacidade de gravación, edición, produción, realización e
emisión de vídeo en directo). Ademais, dispón dun espazo de
carga.