High Tech Auto de Galicia lanza dende Vigo a súa cuarta convocatoria
martes, 14 de xuño do 2022
A
sede do Consorcio da Zona Franca de Vigo acolleu este martes 14 de
xuño o acto de lanzamento da cuarta edición da incubadora de alta
tecnoloxía High Tech Auto, destinada a captar proxectos de
emprendemento no ámbito da automoción e a súa transformación
intelixente, eficiente e sustentábel. O período para presentar
candidaturas estará aberto até o 21 de setembro.
Asistiron
ao acto deste martes o delegado do Estado no Consorcio da Zona Franca
de Vigo, David Regades; o alcalde de Vigo e presidente do Consorcio,
Abel Caballero; o vicepresidente e conselleiro de Economía,
Industria e Innovación da Xunta, Francisco Conde; así como o
presidente da Fundación CEAGA, Roberto Cavallo; e a directora de
Proxectos FEDER da Fundación INCYDE, Natalia Vázquez.
David
Regades destacou que “en Zona Franca temos moita experiencia e
coñecemento, porque levamos unha década pondo en marcha incubadoras
e aceleradoras con datos que falan por si sós: 1.350 proxectos
acelerados e uns 1.500 empregos creados”. O delegado do Estado
salientou tamén os datos da incubadora HTA, que en tres edicións xa
apoiou a 54 emprendedores e impulsou a constitución de 14 empresas e
8 prototipos. Engadiu que a intención da Zona Franca é converter
Vigo en protagonista do automóbil do futuro.
Abel
Caballero, explicou que “a incubadora High Tech Auto sitúanos como
polo de innovación no sector da automoción. Vigo destaca polo seu
carácter emprendedor e tamén pola formación da súa Universidade”.
Engadiu que “é difícil atopar unha cidade coa cultura de
emprendemento como ten Vigo”.
Pola
súa banda, Francisco Conde, Conde, enxalzou a colaboración entre o
Consorcio Zona Franca de Vigo, a Fundación INCYDE e a Xunta de
Galicia, e apuntou que este programa “contribúe á competitividade
do sector da automoción a través da transferencia de tecnoloxía a
toda a cadea de valor”. Tamén apuntou que esta incubadora forma
parte do ecosistema de innovación que rodea o sector galego da
automoción, e remarcou a necesidade de apostar por este sistema
porque, segundo incidiu, “é o que dá valor engadido a esta
industria e o seu gran aval”.
O
acto de lanzamento da cuarta edición da HTA contou coa experiencia
de dous proxectos incubados: Rita Carou, de Navia 3D e Javier
Miralles, de Siscar-Connect.
A
incubadora abriu este martes as portas dos seus programas e servizos
a estudantes, emprendedores, spin-outs, spin-offs e/ou
start-ups, nacionais e internacionais, que teñan un proxecto
no sector de automoción e loxística.
O
período de convocatoria está aberto desde o 14 de xuño até o 21
de setembro de 2022, aceptándose só as inscricións realizadas
mediante o formulario online dispoñíbel na súa web oficial
www.htauto.gal. Tras o período
de convocatoria, seleccionaranse o dez proxectos que formarán parte
da cuarta edición da High Tech Auto.