HP podería integrar webOS nas súas impresoras

Coa adquisición de Palm por parte de HP agardabamos ver cedo unha renovación da estratexia en produtos coma os smartphones ou o tablet coñecido coma HP Slate, e durante a presentación dos resultados económicos da compañía o seu máximo responsable, Mark Hurd, confirmou que van levar o sistema operativo desenvolvido por Palm, o webOS, a distintos tipos de dispositivos «incluíndo tablets e impresoras conectadas á web», de xeito que nos vindeiros meses poderiamos ver impresoras con pantalla táctil para controlar as súas funcións máis avanzadas, o que sería unha interesante proposta da compañía.
¿De qué podería servir introducir webOS en impresoras? Pois aparte de para controlar as funcións habituais, substituír aos distintos botóns e poder facer uso das mesmas coma fotocopiadoras avanzadas, incluso podería aproveitarse para realizar directamente a impresión de contidos na Internet, coma páxinas web, fotografías en servizos en liña e documentos en rede. Unha serie de posibilidades para o que normalmente as impresoras precisarían estar conectadas a un PC, de xeito que gañarían en liberdade e versatilidade, especialmente en contornos empresariais.