FACUA denuncia os prezos abusivos dos contidos para móbiles

A asociación de consumidores FACUA denuncia nun informe titulado Alerta: descargas en tu móvil que os servizos de contidos para móbiles (os chamados SMS Premium) teñen uns prezos abusivos, publicidade pouco transparente e necesidade dunha regulación específica que garanta a protección dos consumidores. Tamén piden que dende o Instituto Nacional de Consumo, a Secretaría de Estado de Telecomunicacións e as autoridades autonómicas controlen este sector e actúen contra as irregularidades que padecen os consumidores.
FACUA advirte de que a publicidade procura ocultar o elevado importe dos servizos (o que podería vulnerar a Lei Xeral para a Defensa dos Consumidores e Usuarios, que establece a obriga de indicar o prezo final completo) e os detalles dos mesmos figuran nunha tipografía diminuta, polo que sería necesario que regulasen o tamaño mínimo.
No caso dos servizos de subscrición reparan no feito de que é difícil saber o número máximo de mensaxes que se recibirán cada mes, polo que se descoñece o consumo (que pode chegar ata os 23 euros/mes aínda que non se descargue ningún contido) que se fará ó confirmar a alta.
Dado que para descargar politonos ou vídeos hai que remitir varias mensaxes Premium e facer uso dunha conexión de datos, estiman que unha descarga musical pode custar ata 4,75 euros, mentres que un videoclip pode chegar ós 7,54 euros.