FACUA denuncia o desprezo de Ono aos seus clientes ao compensar un corte do móbil de 25 horas con 200 Mbytes de datos
martes, 3 de xuño do 2014
FACUA-Consumidores en Acción está a denunciar a deficiente
compensación coa que Ono quere resarcir aos seus clientes tras sufrir un corte
do servizo de telefonía móbil durante 25 horas (entre as 18 horas do
domingo e as 19 horas do luns), xa que a compañía limitouse a remitir unha
mensaxe na que aseguraba que engadirían 200 Mbytes adicionais á tarifa de datos
dos usuarios afectados, o que dende FACUA non dubidan en considerar como unha “roñosa
compensación”, que boa parte dos clientes nin sequera poderán gozar por non chegar
a consumir o volume mensual das súas tarifas de datos.
Dende FACUA lembran que cando Jazztel padeceu un corte do servizo móbil de
entre 10 e 14 horas o pasado 12 de abril compensou aos seus clientes
aboándolles 5 euros nas súas facturas. Tamén insisten en que a lexislación actual
recolle unhas compensacións económicas ridículas para os cortes de servizos de
telecomunicacións, que veñen a ser practicamente como devolver a cantidade
económica proporcional ao custo do servizo para o usuario, ignorando os
prexuízos provocados pola incomunicación (que deberían demostrarse e terían
unha reclamación moi complexa), o que no caso do corte de Ono suporía que os
clientes que paguen unha media de 30 euros/mes, poderían recibir unha
compensación de 1,04 euros (que Ono ten que aboar por Lei, non sendo suficiente
a polémica compensación en especie).