El Corte Inglés, novo operador virtual de telefonía móbil

Habemus nova operadora de telefonia móbil. Neste caso non se trata dunha empresa desenvolvida expresamente para achegar servizos desta índole, senón máis ben dunha firma que semella querer cubrir unha chea de frontes: El Corte Inglés.
Mais, iso si, tampouco será un operador ó uso, senón un operador virtual, o que quere dicir (falando claramente) que achegará os servizos ós seus clientes a través da rede de Telefónica Móviles. Así o fixeron saber estes días as empresas, logo da sinatura do correspondente acordo.
A posta en marcha desta nova liña estratéxica de El Corte Inglés, que vai encamiñada a competir no mercado cos restantes operadores móbiles virtuais (Carrefour –o primeiro en saír- ou The Phone House), aínda non ten data definitiva. As firmas asinantes tampouco especificaron o tipo de investimento preciso para pór operativo o servizo.