As operadoras chinesas cifran en 14.000 millóns as mensaxes de texto enviadas no Aninovo Luar

Nun país de proporcións tan xigantescas como China, tanto no que se refire á súa propia superficie no mapa como en cuestións de poboación, todo resulta case excesivo. O eido da tecnoloxía non é unha excepción a esta regra de facer as cousas ó grande. Un moi bo exemplo disto é o que vai acontecer coas mensaxes breves de texto de felicitación do Aninovo Luar (festexo que non se limita a unha soa noite senón a unha semana enteira de farra a partir deste domingo 18, co que se redondea á alza calquera cifra obtida sobre o emprego de tecnoloxía). Así, segundo informa EFE, as dúas grandes operadoras de telefonía móbil (China Mobile e China Unicom) que traballan no país calculan que se van enviar 14.000 millóns de sms ó longo destas xornadas.
Cómpre dicir que só no caso de Pequín, rexistrouse o envío de 400 millóns de mensaxes de texto a unha velocidade de 5.800 por segundo. Polo que respecta a 2006, foi un ano no que quedou claro que China xoga con moitos números nisto das mensaxes a terminais: contabilizáronse case 430.000 millóns de sms ó longo de todo o ano, cunha taxa diaria de 1.200 millóns e xerando uns beneficios de máis de 100 millóns de iuáns (preto de 10 millóns de euros).