A rapazada de Talentos Inclusivos do CITIC mostra unha decena de revolucionarias solucións
venres, 17 de xuño do 2022
A
segunda edición do proxecto Talentos Inclusivos, posto en marcha
polo Centro de Investigación TIC (CITIC) da Universidade da Coruña
e ASPACE Coruña, chegou este venres 17 de xuño ao
seu remate coa presentación de preto dunha vintena de solucións
tecnolóxicas desenvolvidas para mellorar a calidade de vida de
persoas con parálise cerebral. Detrás destas solucións,
concibíndoas e dándolles corpo, atopábanse preto de 200 estudantes
da Coruña e a súa contorna. A iniciativa conta co apoio do Consello
Social da UDC, a Fundación Española para a Ciencia e a Tecnoloxía
(FECYT), a Consellería de Cultura, Educación e Universidade da
Xunta de Galicia e o Concello da Coruña.
Este
proxecto ten o obxectivo de “espertar vocacións tecnolóxicas
entre a xuventude, á vez que trata de sensibilizar sobre a
diversidade funcional”.
Durante
todo o curso escolar, preto de dous centenares de estudantes de
Secundaria e Bacharelato de 10 centros educativos da provincia da
Coruña, xunto con arredor de 30 usuarios de ASPACE, resolveron retos
tecnolóxicos propostos polos propios usuarios, para facilitar
diferentes actividades da súa vida diaria. Estes desenvolvementos xa
teñen aplicación real, posto que están sendo utilizados polo
centenar de usuarios de ASPACE Coruña.
A
mesa de apertura do acto contou coa presenza do vicerreitor de
Política Científica, Investigación e Transferencia da UDC,
Salvador Naya Fernández, que felicitou ao alumnado polo éxito dos
retos desenvolvidos. A presidenta de ASPACE Coruña, Carmen Barreiro
Santos, asegurou que Talentos Inclusivos “supuxo un antes e un
despois en ASPACE, xa que cambiou a vida das persoas da nosa
entidade”.
A
continuación, o secretario do Consello Social da UDC, Jesús Spósito
Prado, explicou que “o Consello Social confía no enorme potencial
deste proxecto, xa que é a viva imaxe da inclusión”.
Pola
súa banda, a directora do departamento de Cultura Científica e da
Innovación da FECYT, Rosa Capeáns Garrido, quixo salientar que
“Talentos Inclusivos reflicte como o futuro da comunicación
científica inclusiva está xa acontecendo, posto que axuda a facer
que a ciencia e a tecnoloxía cheguen a todo o mundo”.
Seguidamente,
a subdirectora xeral de Innovación, Orientación e Formación de
Recursos Humanos da Xunta de Galicia, Mª Eugenia Pérez Fernández,
manifestou que a “Consellería está traballando conxuntamente co
CITIC para potenciar o programa, que é un caso de éxito de
colaboración entre institucións para avanzar cara un modelo
educativo plenamente inclusivo”.
Finalmente,
o concelleiro de Educación, Memoria Histórica, Innovación,
Industria e Emprego do Concello da Coruña, Jesús Celemín Santos,
eloxiou aos estudantes por ser “un exemplo de cara onde debe
camiñar a sociedade” e destacou a importancia da educación en
valores.
O
director do CITIC, Manuel F. González Penedo, pechou o acto e
avanzou que o proxecto contará cunha terceira edición, na que se
seguirá traballando “para conseguir unha sociedade más xusta,
máis inclusiva e máis solidaria”. Tamén indicou que “Talentos
Inclusivos está aliñado co obxectivo principal do CITIC, que é
proporcionar coñecemento científico nas TIC en beneficio da
sociedade”.
Os
equipos de estudantes presentaron os seus traballos, introducidos
polo investigador principal do proxecto e subdirector do CITIC,
Javier Pereira Loureiro, e a coordinadora do proxecto en ASPACE, Iria
Robles Viqueira. Os centros educativos participantes nesta segunda
edición foron o IES Miraflores de Oleiros, que desenvolveu
ramplas de accesibilidade en impresión 3D; o Colexio Calasanz PP.
Escolapios de Coruña, que realizou un comunicador en contorna
Scratch que interactúa con Alexa; o IES Terra de Trasancos de
Narón, que elaborou un dado electrónico con Arduino con carcasa
con impresora 3D e un licornio en impresión 3D; o IES de
Ortigueira, cun timbre sen fíos adaptado para avisar ao
coidador; o IES Sofía Casanova de Ferrol, que creou
adaptacións dun timbre sen fíos, un mando a distancia de televisión
e o videoxogo Tetris, así coma un xogo de luces para
traballar a mobilidade; o IES Agra do Orzán da Coruña
produciu un xogo de luces para traballar a mobilidade e un mesturador
de datos con premedor; o IES Ramón Menéndez Pidal - Zalaeta da
Coruña levou a cabo os retos dun dominó para persoas con baixa
visión e diferentes elementos de ocio-musical controlados por
sensores; o IES As Mariñas de Betanzos desenvolveu unha mesa
de luz sensorial e un dominó adaptado; o IES David Buján de
Cambre realizou produtos de accesibilidade para o ordenador e a
tableta con impresión 3D; e o IES Rego de Trabe de Culleredo
elaborou un comunicador en téxtil intelixente que envía mensaxes en
resposta a estímulos.