A nova edición de eShow celébrase en Barcelona os vindeiros 25 e 26 de marzo
martes, 17 de febreiro do 2015
Barcelona vai acoller o
mes vindeiro, o 25 e o 26 de marzo, a
edición número 17 do salón eShow, sen dúbida unha das feiras
máis relevantes do mundo en materia de comercio electrónico,
mercadotecnia en liña, redes sociais, dispositivos móbiles e
Internet das cousas. O evento eShow, segundo indican os seus
responsábeis a cita TIC máis referencial de Iberoamerica,
celebrarase no pavillón número 1 da Fira de Barcelona (recinto
Montjuïc), onde se darán cita até 180 marcas do sector procedentes
de ámbalas beiras do Atlántico. No evento exporanse as últimas
tendencias nacionais e internacionais ao tempo que se achegará “un
completo programa de conferencias, foros de debate e sesións de
traballo en rede”. A columna vertebral desta edición será unha
aposta integral por tirar abaixo fronteiras.
A axenda da xuntanza
inclúe relatorios a cargo de Matt Crystal, de Pinterest, Kevin
Gardiner, de Macy´s, Jon Matonis de Bitcoin Foundation, Tom Buday,
de Nestlé Suíza, entre outros representantes internacionais do
sector dixital. Entre os temas a tratar figuran os seguintes: a
relevancia experiencia do usuario no comercio electrónico, as novas
formas para chegar aos clientes a través das redes sociais, a
estratexia de comunicación en liña das grandes marcas, o
afianzamento de divisas electrónicas como forma de pago dixital ou o
espallamento internacional dos xigantes mundiais do ecommerce.
O
programa tamén inclúe a celebración de actividades como a
Digital Travel Summit (para coñecer as últimas tendencias en
turismo dixital e os novos modelos de distribución turística) e a
Net Fashion Forum (debates e casos de éxito sobre tecnoloxía
e moda ou sobre a experiencia dixital na tenda física e o vídeo
como aposta de marca e negocio). Tamén haberá, en colaboración con
Casa Asia, un foro internacional sobre a situación actual do
ecommerce e a mercadotecnia dixital en China. Igualmente,
están convocados nesta edición os eAwards, os premios que recoñecen
publicamente as innovacións desenvolvidas polas páxinas web
estatais, a súa excelencia, profesionalidade, investigación e
desenvolvemento, coa finalidade de mellorar a experiencia de compra
dos clientes ou navegantes. As
inscricións poderán realizarse a través da páxina web de eShow
Barcelona 2015.