A PlayStation 3 aparece moi rebaixada en distintas tendas
xoves, 6 de agosto do 2009
Os rumores sobre a rebaixa
de prezo da PlayStation 3 de Sony foron desmentidas continuamente por Sony e
pola realidade, pero agora esta última está a resistirse, e dá a impresión de
que a PS3 reducirá de prezo de xeito inminente se atendemos a diversas ofertas
que están a verse no mercado europeo, de xeito que en vez de a 399 euros,
podemos atopar a PS3 con disco duro de 80 Gb a 329,95 euros na web da
tenda de videoxogos Game, a
299 euros na tenda virtual española Alternate e a
249 euros na cadea italiana de tendas CHL (por ter un desconto do
35% ata o 31 de agosto).
Á vista desta diversidade de prezo non é de sorprender que agora se comente que
o
vindeiro 18 de agosto na GamesCom de Colonia os representantes de
Sony anunciarán oficialmente unha rebaixa de 100 euros no prezo oficial da súa
consola, o que a achegaría aos seus competidores, dos que a distancia actual é
abismal (a Xbox 360 pode adquirirse a partir de 179 euros).
