53 novos concellos galegos adheriranse á Rede CeMit este ano
xoves, 9 de decembro do 2010
Ata un total de 53 concellos das catro
provincias galegas van formalizar a súa adhesión á Rede de Centros para a
Modernización e Inclusión Tecnolóxica (CeMit) antes de que acabe o ano, para,
segundo as previsións da Xunta, iniciar a súa actividade a comezos do 2011.
A intención do goberno galego é “promover o uso das novas tecnoloxías por
parte de tódolos galegos e galegas” (especialmente nos colectivos e nas
zonas onde a fenda dixital é máis evidente) para o cal dispón de preto dun millón de euros a investir nestas aulas
públicas de acceso a Internet.
Dos 53 municipios que se adherirán á rede
este ano, 47 están situados no medio rural e só os
seis restantes teñen máis de 20.000 habitantes.
Estas aulas tecnolóxicas contarán con cadanseu “axente TIC”, que será a persoa encargada
do bo funcionamento de tódalas actividades que se leven a cabo nelas, os cales
recibirán formación continua, segundo afirman dende a Xunta, “encamiñada a lograr a súa capacitación
social e tecnolóxica para consolidarse como elementos dinamizadores das novas
tecnoloxías”.
Asemade,
as aulas de Rede disporán dun Plan de
Alfabetización Dixital que engloba aos colectivos galegos onde a fenda
dixital é máis evidente, tales como desempregados, maiores, inmigrantes,
mulleres, persoas con discapacidade, menores e poboación rural en xeral.
Por outra
banda, ademais de
fomentar o uso das TIC entre os devanditos grupos poboacionais, esta Rede tamén
fomentará a formación dixital entre os profesionais galegos, e mostraralle ás pemes e micropemes as vantaxes da sociedade da información, sen deixar de
difundir os servizos da Administración electrónica e de capacitar á cidadanía
galega para empregalos.
En canto á
infraestrutura tecnolóxica da nova Rede, informan dende o Executivo que “terá un papel preponderante o software
libre, permitindo deste xeito que a formación da cidadanía en tecnoloxías da
información sexa fundamentalmente en ferramentas de código aberto”.
Os Concellos
que nesta primeira volta se adherirán á Rede CeMit son: Ames, Sada, As Pontes,
Porto do Son, Camariñas, Cerceda, Mugardos, San Sadurniño, Corcubión,
Vilasantar, Santiago, Ribeira, Boiro, Betanzos, Padrón, Arzúa, Ares e Fisterra,
da provincia da Coruña.
Da
provincia de Pontevedra, integraranse na Rede CeMIT os concellos de Moaña,
Porriño, Poio, Tomiño, Vilanova de
Arousa, A Guarda, Valga, Cuntis, Campo Lameiro, Vigo, Ponteareas e Lalín
En
Ourense asinarán o protocolo de adhesión os concellos de Ribadavia, Boborás,
Castrelo de Miño, Leiro, Xunqueira de Ambía, Sarreaus, A Bola, Beariz, Manzaneda, Vilar de Santos, Verín, Barco de
Valdeorras, O Carballiño, Celanova,
Allariz e Castro Caldelas.
E por último,
dende Lugo incorporaranse á Rede os Concellos de Lugo, Ribadeo, Burela,
Carballedo, O Vicedo, Riotorto e Sarria.