Xunta, Navantia e UDC fan avanzar o estaleiro do futuro no Campus Industrial de Ferrol
venres, 25 de novembro do 2022
O
Campus
de Ferrol acolleu este venres 25 de novembro a presentación do
Centro Mixto de Investigación UDC-Navantia. Trátase, segundo se
fixo saber, da evolución da Unidade Mixta de Investigación
UDC-Navantia, constituída en 2015 e que implicou a un centenar de
investigadores procedentes das dúas entidades. Será, engadiron, un
sólido alicerce para o estaleiro do futuro.
Na
cita participaron o reitor da UDC, Julio Abalde, o conselleiro de
Economía, Francisco Conde, o director do negocio de Fragatas e
Buques de Navantia, Eduardo Dobarro, a directora de GAIN (Axencia
Galega de Innovación), Patricia Argerey, o director do proxecto do
centro por parte de Navantia, Rafael Morgade, e o investigador
principal por parte da UDC no CEMI UDC-Navantia, Pablo Fariñas.
Pablo
Fariñas mencionou algúns dos logros obtidos nos últimos seis anos
de traballo. En concreto, dixo que co apoio de GAIN a UMI tivo un
investimento total de 4,9 millóns de euros, dos que Navantia aportou
tres, 1,4 millóns de Gain e 0,5, a UDC. Amais, mencionou algúns dos
resultados acadados nas 16 liñas de investigación abertas coa UMI,
como os 154 investigadores implicados, dos que 42 foron novas
contratacións, que lle dedicaron ao proxecto máis de 368.000 horas
de traballo. Dúas patentes e rexistros de software, un premio de
transferencia de tecnoloxía, cinco procedementos industriais, tres
algoritmos e dez modelos piloto “son algúns dos logros obtidos”,
dixo, salientando tamén a parte académica, coas máis de 95
publicacións científicas, once teses de doutoramento e máis de 50
presentacións en congresos. A UMI foi “un sementeiro de talento”,
salientou, engadindo que “froito da investigación da UMI xurdiron
proxectos como o Buque sen cables ou o Xemelgo Dixital
que, co seu desenvolvemento, constitúen un fito na construción
naval militar mundial”.
Rafael
Morgade, pola súa banda, apuntou que o CEMI contribuirá á
competitividade e eficiencia dun estaleiro que está en plena
transformación. “Temos en Ferrol coa CEMI unha oportunidade
única”, engadiu.
Nesta
mesma liña foi a intervención de Eduardo Dobarro, quen afirmou que
“esta é unha historia de éxito de seis anos e o labor de
continuidade da CEMI é clave para a innovación do estaleiro”, e
manifestou o seu desexo de que nesta nova etapa se implique a outras
entidades como a industria auxiliar e a Armada. Dobarro manifestou o
seu optimismo co futuro da construción naval de Ferrol ao declarar
rotundo que “vén unha década dourada para Ferrol”.
O
reitor destacou que a CEMI é unha continuación lóxica do traballo
realizado por Navantia, UDC e GAIN nos últimos anos cuns resultados
que superaron as expectativas o que animou a Abalde a pedir á Xunta
máis financiamento para investigación porque, á vista dos logros
obtidos, vese que “non é un gasto senón un investimento”.
O
conselleiro recoñeceu o traballo desenvolvido nestes últimos seis
anos felicitando a Navantia e á UDC. O vicepresidente primeiro
explicou que a UMI primeiro e agora o CEMI xeran un ecosistema
científico e tecnolóxico desde o punto de vista académico e
industrial. “Os ecosistemas teñen sentido cando hai talento e a
CEMI é unha aposta polo talento”, concluíu.