Wi-Fi de balde para Cidade de Deus

A favela de Río vista no espazo de Hooked on Monix no Flickr

A Rede de acceso integral e libre non vai ser a solución a todos os problemas de violencia que ten Cidade de Deus, unha das favelas máis coñecidas de Río (en parte grazas ao filme de Fernando Meirelles e en parte por ser un dos espazos menos favorecidos social e economicamente do país), pero pode que contribúa a pór a primeira pedra dun incremento na calidade de vida dos seus veciños ou, polo menos, dun máis completo abano de posibilidades para os mozos e mozas da zona. Segundo se conta en webs como Lavidawifi, o Goberno do Estado de Río vén de poñer en marcha un programa de divulgación e promoción do acceso á Sociedade do Coñecemento que, entre outras cousas, inclúe a incorporación dunha infraestrutura de Wi-Fi gratuíto a partir deste mes na devandita favela.
A iniciativa, que conta coa participación da multinacional Motorola, apóiase nos mesmos tres alicerces que impulsaron previamente a dinamización dixital de outras zonas da cidade: Rede de balde para tentar frear a falta de oportunidades que leva á marxinación, achega de servizos xerais para a comunidade e acceso Wi-Fi para apoiar a rendibilidade e competitividade dos pequenos empresarios do barrio.
A proposta, nun sentido máis xenérico, xorde coa finalidade de empregar a Rede como porta de entrada para outro vieiro de vida diferente do que subministran as mafias para a xente nova. Asemade, preténdese universalizar o servizo de Internet, que para o Goberno brasileiro e dos seus distintos estados semella ser dende hai tempo un firme compromiso (así o evidencia, por exemplo, a aposta polo software libre a todos os niveis). Segundo se conta na Internet, o deseño e a posta en marcha da rede púxose en marcha grazas a Motorola a través do seu socio no país irmán, Mibra Engenharia.