Vilagarcía tirará proveito dos Next Generation para impulsar a transformación TIC do comercio
martes, 4 de xaneiro do 2022
Vilagarcía
comezou o ano con boas novas para a súa economía, máis polo miúdo
para un dos sectores máis afectados polas consecuencias da pandemia:
o comercio de proximidade. En
concreto, o Concello comunicou que recibirá 537.023 euros dos fondos
europeos Next Generation para financiar o Vilagarcía Viva
o proxecto de revitalización do comercio de proximidade deseñado
pola Concellería de Promoción Económica do Concello que ten entre
os seus obxectivos impulsar a transformación dixital da rede local
de establecementos.
“Con
esta nova”, explicou o Concello, “Vilagarcía fai pleno no Plan
de Recuperación, Transformación y Resiliencia posto en marcha polo
Goberno do Estado con fondos liberados pola Unión Europea para
paliar a crise económica xerada pola pandemia, posto que ademais
desta, tamén obtivemos financiamento a segunda proposta presentada á
convocatoria, a do Plan de Sustentabilidade Turística en Destino
(PSTD), que recibiu outros 2,5 millóns de euros”.
A
iniciativa Vilagarcía Viva enmárcase no Plan de
Promoción e Recuperación Económica Vilagarcía 20-21 que está a
executar o Concello cunha dotación superior ao millón de euros. A
intención do Executivo vilagarcián era ampliar este plan ata finais
de 2022, “algo que xa está garantido coa obtención desta nova
axuda”, explicaron fontes do Goberno local, engadindo que os fondos
terán como obxectivo revitalizar o comercio de proximidade, un dos
sectores que máis sufriu durante a crise sanitaria, xa que a liña
do programa europeo a través da que se obteñen é a dedicada ao
“apoio a mercados, zonas urbanas comerciais, comercio non
sedentario e canles curtos de comercialización”.
As
accións a desenvolver oriéntanse á transformación tecnolóxica e
do punto de venta dos negocios (co fin de mellorar os procesos de
compra, promoción e distribución a través de zonas dixitalizadas
de carga e descarga, a instalación de puntos de entrega de produtos
intelixentes en diferentes zonas da cidade, a posta en marcha de
ferramentas de autodiagnóstico para as empresas ou a formación TIC
personalizada), a actuacións de sustentabilidade e economía
circular, a formación para o sector comercial e a intervencións en
materia de adecuación de espazos, eficiencia enerxética e xestión
de residuos.
“O
obxectivo é aproveitar estes fondos para promover a modernización
do tecido comercial local, de xeito que saia fortalecido e sexa máis
competitivo e eficiente de cara ás necesidades do consumidor actual,
á vez que se axuste aos requisitos medio ambientais e enerxéticos
que se defenden dende Europa”, engadiu o Concello.