Unicamente o 3% dos consumidores aboa o prezo dos contidos

Falabamos o outro día do regular tirando a mala que é a curva de crecemento dunha boa parte dos videoclubs en liña, sendo os elevados prezos por aluguer e certos atrancos na reprodución os principais lastres do sector. Pois ben, a outra cara da moeda (a que se convoca cando nos preguntamos qué fai a xente para ver películas agora que os videoclubs en calquera das súas variantes non erguen cabeza) témola nun estudo no que se di o que xa se intuía: que moi pouca xente paga por contidos. Máis polo miúdo, o 3% dos españois.
O estudo da consultora GfK sinala que estamos a falar dunha contía de cartos, 195 millóns de euros no último ano, que está moi lonxe do que debería ser. As razóns de todo isto son probablemente as de sempre: a falta de entendemento entre quen achega contidos e os consumidores potenciais, os primeiros pasándose (xeralmente, non sempre) cos prezos e os segundos apostando cegamente pola fórmula do todo de balde. Volvendo ao estudo, dicir que os clientes de pago gastan unha media de 8,3 euros ao mes, sendo os videoxogos os líderes do mercado, con 90 millóns de euros e unha media de gasto de 11,75 euros. A música está na segunda posición. Os vídeos acadan un gasto mensual de 9,73 euros e os e-books están á cola da clasificación con só cinco millóns. O estudo tamén revela que unicamente o 12,2% dos cidadáns consume contidos e lecer en liña, dos que o 27% paga por eles. Entre as conclusións que se sacan atópase a seguinte: o computador constátese como un medio incapaz para afianzarse como soporte de pago, e só o desenvolvemento de novos dispositivos móbiles, intelixentes, vai permitir que se cree un mercado de pago.