Un investigador da UVigo traballa en facer máis rendíbeis as comunicacións satélite-estación
mércores, 19 de xuño do 2013
O investigador Antonio
J. Váquez está a presentar estes días dende a Universidade
de Vigo unha máis que interesante proposta-estudo para minimizar
o custo das comunicacións entre os satélites e as estacións de
Terra ao tempo que se incrementa o tempo de conexión. A súa tese,
dirixida a achegar mellora nas dependencias terrestres en operacións
de aparellos de
tipo Cubesat, propón un sistema de comunicación alternativo
empregando dúas antenas de xeito simultáneo para poder recibir de
xeito correcto o sinal de satélites que orbitan a grandes alturas en
relación á superficie terrestre. A súa solución, que xa foi
probada na estación do aparello galego XaTcobeo,
tería aplicabilidade nas estacións GENSO (Global Educational
Network for Satellite Operations),
que é unha
rede internacional de infraestruturas de terra aeroespaciais.
Polo
tanto, a idea sería levar o soft-handover á
rede de estacións GENSO, o que reduciría “o custe de
implementación”.
Así nolo explica: “Empregar varias estacións en rede
fronte a unha única cun sistema de diversidade reduce en gran medida
os custes, xa que o sistema único precisa máis equipos e de maior
calidade, así como un maior esforzo de deseño. Coas melloras no
software da rede GENSO unicamente será necesaria unha estación
sinxela que se complementa mediante diversidade coas estacións máis
achegadas. A redución de custes para a misión sería máis da
metade do orzamento da estación terrea e incluso sería viable
desenvolver unha misión sen estación terrea propia, o que
melloraría aínda máis as cifras”, asegura Vázquez.
Segundo engade, o
proxecto GENSO emprega na actualidade o resto de estacións como
respaldo para recibir máis datos doutros países, pero limita o
tempo de comunicación directa co satélite a intervalos de como
máximo 20 minutos. Ao introducir o soft-handover dáse unha
transferencia suave da conexión co satélite entre distintas
estacións, “de forma que non se interrompa a comunicación con
Terra ao perder a cobertura e que se conecte de xeito simultáneo a
outra terminal”, explica.
Segundo informa a
Universidade de Vigo, o investigador estudou a viabilidade da
introdución dese concepto na rede GENSO, propuxo os esquemas para a
súa integración e o impacto potencial das melloras na misión. Polo
tanto, non só se poderían establecer comunicacións de maior
calidade e de máis dunha hora sen cortes entre centro de control e
satélite, senón que achega unha gran flexibilidade para a
planificación da misión e permitiría realizar experimentos que
requiran máis datos, como a descarga de imaxes de alta resolución.
En palabras do investigador, a súa proposta “triplica o
tempo máximo de pase, pasando de 20 minutos a máis dunha hora”.
Ademais, engade, “é posible mellorar considerablemente a
calidade das comunicacións aínda mantendo os 20 minutos de tempo
máximo de pase. Xa que a cobertura temporal da rede de estacións é
dun 45% na actualidade fronte ao 3% da misión uni-estación, se os
centros de control en Terra comunican co satélite traballando con
elevacións altas a conexión mediante soft-handover consegue pases
de maior calidade, mellorando en máis de 10 dB a marxe de enlace”.
Antonio J. Vázquez
leva os últimos cinco anos traballando nos diferentes proxectos de
espazo desenvolvidos pola Universidade de Vigo. Foi responsábel do
segmento terreo do XaTcobeo, colaborador na parte de estación terrea
dos proxectos HumSAT (Humanitarian Satellite), ESMO (European Student
Moon Orbiter) e ESEO (European Student Earth Orbiter) e responsable
de Soporte e Operacións de GENSO, no que leva involucrado os últimos
catro anos e que o levaron a ser coautor de varios artigos sobre a
rede publicados tanto no ESA Bulletin como en congresos
internacionais.