Telefónica deu a coñecer os 50 proxectos para Galicia Open Future, que comeza este mes a súa andaina
mércores, 3 de setembro do 2014
Temos máis novidades sobre a andaina de Galicia
Open Future (GOF), o proxecto impulsado por Telefónica e AMTEGA
para dar forma a un centro de crowdworking de novas empresas
TIC emprazado na Cidade da Cultura de Santiago. Trátase de dúas
grandes novidades: unha xenérica, a posta en marcha oficial de GOF
este mes de setembro, e outra específica: os nomes das iniciativas
seleccionadas. Recordar que
en xullo a operadora deu a coñecer que se acadaran máis de 130
candidaturas para participar nesta palestra de empresas innovadoras,
informando tamén de que da cifra final de 136 iniciativas
presentadas, seleccionáronse finalmente 50 proxectos (a listaxe está
dispoñíbel en formato pdf). Estes beneficiaranse
dos servizos de apoio ofertados polo programa e dun patrocinio
inicial por parte da Axencia Galega de Innovación (GAIN) de
2.000 euros cada un.
Lembrar que Galicia Open Future pon a disposición
de emprendedores o asesoramento, a formación e os recursos técnicos
e financeiros precisos para pór en valor o desenvolvemento de
iniciativas empresariais innovadoras. Os proxectos seleccionados
participarán nos vindeiros meses nun plan de formación específico
e de asesoramento para consolidar a súa idea e plan de
emprendemento, que culminará coa futura selección dos tres mellores
proxectos, os cales recibirán unha axuda por parte da GAIN de 25.000
euros. Así mesmo estes e os outros proxectos do programa poderán
ter acceso a outros instrumentos financeiros da Xunta de Galicia para
a súa consolidación.
Lembrar tamén que Galicia Open Future constitúe a
gran iniciativa galega de Telefónica en 2014, unha palestra de
proxectos tecnolóxico-dixitais que permitirá aos seus integrantes
traballar libremente cos profesionais que estean máis preto (na
propia aceleradora) pero tamén con xente afín a milleiros de
quilómetros de distancia. Galicia Open Future, unha iniciativa
inserida no Pacto Dixital asinado entre unha ducia de empresas (entre
as que se conta Telefónica) e AMTEGA, comeza a súa andaina
(oficialmente) este mes de setembro.
A maioría dos 50 proxectos seleccionados procede de
Vigo e A Coruña, seguidas de Santiago de Compostela, e presentan
diferentes graos de maduración (idea, prototipo, piloto, lanzamento,
comercialización). Céntranse en sectores como o tecnolóxico
aplicados a distintos ámbitos (marítimo-pesqueiro, agricultura,
enerxía), Cidades Intelixentes, lecer, cultura, saúde, educación e
turismo, e algúns xurdiron en universidades e centros tecnolóxicos
de Galicia. Telefónica salientou tamén a presenza de proxectos de
dixitalización, comercio electrónico e aplicacións
móbiles.
Segundo informou en xullo a operadora, “os
emprendedores seleccionados recibirán asesoramento para que o seu
proxecto gañe visibilidade, acceso a colaboradores que axuden a que
as iniciativas evolucionen e as ferramentas para validar o
funcionamento dos seus proxectos con clientes reais”. Poderán
traballar na sede de Galicia Open Future, situada no edificio Gaiás
de Santiago de Compostela, e tamén a través da plataforma web
(openfuture.org). O
período da estancia será de seis meses, ampliábeis a un máximo
dun ano.