Tecnoloxía galega para a recollida de lixo da capital dos Emiratos Árabes
xoves, 9 de decembro do 2010
A tecnoloxía galega bótase
fóra da casa, e ás veces máis lonxe do que calquera de nós podería agardar.
Nesta liña é na que se move o grupo Formato Verde/TNL, con emprazamento na Tecnópole
de Ourense, e que recibiu xa hai uns cantos meses o encargo de desenvolver un
innovador sistema de recollida de residuos na capital dos Emiratos Árabes, Abu
Dhabi. A infraestrutura, que incluíu o subministro dun centenar de colectores
de alta capacidade de compactación, é filla do seu tempo: xorde da interrelación
directa da innovación enerxética (en boa medida á procura de meirande eficacia
e respecto polo medio) coas posibilidades das tecnoloxías dixitais
(posibilidades de control, xestión, comunicación, etc). Así, a rede de
colectores incorpora entre outros equipamentos TIC un sistema global de
comunicacións.
Este encargo, informa
Tecnópole, tivo o seu xermolo en 2008, cando Formato Verde resultou elixida
polo concello de Abu Dhabi mediante un concurso de ideas para mellorar o
impacto visual dos colectores na cidade, rebaixar os custes da recollida e
reducir as consecuencias sobre o tráfico que xeraban decote os camións de lixo.
A achega da firma galega, baseada no seu produto BigTainer (un equipo que
compacta até 20 metros cúbicos de residuos sólidos, reducindo así o número de
descargas), centrouse nun comezo a dez puntos de recollida na cidade. O
seguinte paso foi dar cunha solución integral para toda a urbe, un espazo de
case 2 millóns de persoas e cunha taxa diaria de refugallos duns 2,2 quilos por
cidadán, cifra que duplica á taxa española.
A día de hoxe, a firma galega instalou xa 51 dos 97 colectores Big
Tainer contratados. Estes recipientes inclúen unha caixa compactadora de
residuos soterrada, unha plataforma de elevación e máis un sistema glogal de
comunicacións mediante o que cada autocompactador envía un sinal á central de
información con datos en tempo real como a carga depositada, o estado de
funcionamento e a data e hora da última recollida. Este sinal derívase a cada
camión para optimizar así as rutas. Por outra banda, engade Tecnópole, todos os
colectores incorporan tecnoloxía de identificación de usuarios. Asemade, cómpre
sinalar que a adxudicataria do servizo do lixo en Abu Dhabi encargoulle á
empresa galega unha serie de melloras a engadir sobre o colector de serie, que
incluirían conexións para a recarga de coches eléctricos, Wi-Fi, cámaras de
seguridade, displays e espazos
publicitarios.
