Steam estrea grupos familiares

A tenda de xogos para PC de Valve leva unha década ofrecendo o préstamo familiar aos seus usuarios, buscando así replicar a posibilidade de emprestar xogos a outros membros do ámbito familiar como acontecería cos títulos en formato físico, e agora esta funcionalidade reformúlase como o que deron en chamar grupos familiares de Steam.
Dende hoxe, na beta do cliente de Steam, contamos coa posibilidade de crear un grupo familiar de Steam, ao que podemos convidar a un número máximo de 5 integrantes, que poderemos xestionar dende a aplicación de Steam, o móbil ou un navegador web.
Ao unirse a un grupo familiar os usuarios poden elixir os xogos que queiran compartir co resto de integrantes da familia, para a súa incorporación á biblioteca familiar, permitindo así que o xoguen o resto da familia, pero mantendo cadaquén as súas partidas gardadas e os seus logros.
Cómpre salientar que para xogar varios membros da familia á vez ao mesmo xogo é preciso que se teñan adquiridas varias copias, ou sexa, que os préstamos funcionarían igual que con xogos físicos.
Os grupos familiares de Steam inclúen novos controis parentais cos que os adultos poden limitar a que xogan os menores do grupo (e cando o fan). Os adultos poden xestionar os permisos do grupo familiar, e os menores só poden someterse aos mesmos. Entre os límites que poden establecerse figuran o control de acceso a xogos axeitados e o establecemento de tempo de xogo (horarios ou diarios), podendo os adultos ver informes do tempo de xogo, aprobar solicitudes de tempo adicional ou recuperar a conta dun menor se perdeu o seu contrasinal.
Unha das funcións máis interesantes é a solicitude de compra de menores, de xeito que ábrese unha forma de pagamento por parte de adultos para xogos que desexen os menores sen a necesidade de compartir os datos de tarxetas bancarias.
Cómpre salientar que Steam ve os grupos familiares como conxuntos de até 6 integrantes que vivan xuntos, e non todos os xogos son compatibles coa funcionalidade de préstamo familiar (por motivos técnicos ou porque os seus desenvolvedores non o autorizan).
Tamén hai que salientar o feito de que se unha persoa fai trampas nun xogo cunha copia emprestada, o bloqueo non só afectará ao xogador, senón tamén ao propio xogo.