SNK celebra os 20 anos de The King of Fighters con descontos

KOF ’94 foi o xogo que iniciou a principal franquía de xogos de loita de SNK

En 1994 SNK decidiu mesturar os seus xogos de loita Fatal Fury e Art of Fighting, engadindo á fórmula algúns outros personaxes dos xogos Ikari Warriors e Psycho Soldier, dando lugar a The King of Fighters ’94 (KOF ’94), que converteríase no primeiro dunha franquía de xogos de loita que crearía escola, converténdose durante moito tempo no principal rival do Street Fighter de Capcom. Dado que este xogo cumpre hoxe 20 anos, dende SNK decidiron rebaixar até mañá os seus xogos para dispositivos móbiles, que poderán mercarse agora a un prezo de 0,89 euros (o que vén a ser unha rebaixa aproximada do 75%).

The King of Fighter ’97 é un dos xogos que podemos mercar por 0,89 euros

Os xogos que podemos conseguir dentro desta oferta serían The King of Fighters ’97 (para iOS e para Android), The King of Fighters ’98 (para iOS e para Android), Metal Slug (para iOS e para Android), Metal Slug 2 (para iOS e para Android), Metal Slug 3 (para iOS e para Android), Metal Slug X (para iOS e para Android), Samurai Shodown II (para iOS e para Android) e Blazing Star (para iOS e para Android).
Fóra da promoción, e polo mesmo prezo, tamén podemos facernos con The Rhythm of Fighters (para iOS e para Android), unha achega á franquía de loita de SNK cun enfoque musical (haberá que seguir o ritmo para lanzar os ataques que derrotarán aos nosos opoñentes).