SEGA oferta varios dos seus xogos para recadar fondos para causas benéficas

Durante 7 días SEGA únese á iniciativa Humble Bundle para ofrecer un lote dos seus xogos a prezos elixidos polos usuarios para achegar boa parte destes ingresos a varias entidades benéficas (Make A Wish, Whale and Dolphin Conservation, Willow, SpecialEffect e GamesAid). Os usuarios que paguen máis de 1 dólar poderán facerse co xogo de rol e infiltración Alpha Protocol, o xogo de estratexia en tempo real ambientado na Segunda Guerra Mundial Company of Heroes, o xogo de estratexia Rome: Total War e o xogo de plataformas Hell Yeah! Wrath of the Dead Rabbit.

Altered Beast é un clásico de SEGA que pode recuperarse neste lote de xogos semanal

De pagarmos máis de 5,99 dólares engádense ao loto o xogo de estratexia medieval Medieval II: Total War, o curioso xogo de mecanografía e zombis The Typing of The Dead: Overkill, o shooter con robots Binary Domain, Renegade Ops e 10 xogos clásicos de Mega Drive (Altered Beast, Comix Zone¸Crack Down, Ecco the Dolphin, Gain Ground, Golden Axe nas súas 3 entregas, Shinobi III: Return of the Ninja Master e Vectorman).
Os máis xenerosos, que se animen a pagar máis de 14,99 dólares, recibirán a xeito de colofón, o xogo Totol War: SHOGUN 2. Todos estes títulos adquiriranse a través de Steam e só na súa versión para Windows.