R fai balance do seu mes e medio de actividades tecnolóxicas e solidarias contra os efectos da COVID-19
mércores, 29 de abril do 2020
A operadora
galega R lanzou este mércores un novo parte informativo sobre as
iniciativas solidarias e tecnolóxicas (ou directamente
solidario-tecnolóxicas) que está a desenvolver dende o comezo da
crise sanitaria da COVID-19, hai xa un mes e medio. O parte, ateigado
de datos de interese, resúmese nunha mensaxe xenérica da compañía:
o seu compromiso para “garantir as comunicacións e colaborar con
iniciativas sociais para eliminar barreiras de conectividade”.
Trátase dunha declaración de intencións directa contra o posíbel
agrandamento da fenda dixital que afecta a quen non pode teleformarse
ou teletraballar.
Este compromiso de R materialízase nunha atención
“solidaria” ás peticións e necesidades da contorna social,
baixo o lema Tecnoloxía por e para as persoas. Neste senso,
subministrou 200 tarxetas SIM e 300 conexións de balde a
Wificlientes R para alumnado de familias en risco, unha iniciativa de
colaboración coa Consellería de Educación e AMTEGA.
Tamén abriu o seu servizo de televisión en liña
TVComigo (que foi activado por 1.000 pacientes nun prazo de 15 días)
ás persoas que teñen que estar nos hospitais (clientes de R ou non)
e forneceu de canles infantís e de cinema aberto aos seus clientes,
amais de dotalos dun bono de datos gratuíto de 30 GB. A todo isto
cómpre engadir outro completo feixe de iniciativas:
· Envío de mensaxes vía correo electrónico aos
clientes con consellos sobre o uso dos seus servizos e recomendacións
de uso racional e responsábel da rede para lle ofrecer experiencias
de calidade.
· Adaptación á nova situación dos contidos de
todas as redes sociais de R e blog para poder escoitar as principais
inquietudes dos clientes e adecuar os servizos e conectividade a cada
momento.
· Reforzo das plataformas de atención ao cliente
residencial e o soporte técnico a empresas para “dar resposta ás
necesidades de teletraballo das súas empregadas e empregados”.
· Creación dun sitio específico na web de R
para manter informados a todos os/as usuarios/as con novas, consellos
e formas de contacto ante calquera dúbida: R.gal/euquedonacasa.
· No ámbito de atención a empresas clientes
fortaleceuse e dimensionouse a rede para lles garantir ás compañías
a continuidade do servizo ante o incremento de teletraballo. Tamén
se habilitaron en tempo récord accesos VPN, solucións cloud, etc.
· Habilitouse unha plataforma de formación
online gratuíta durante este período para os clientes de
empresa mediante campañas quincenais orientadas á mellora do
teletraballo con contidos como ciberseguridade, equipos, motivación,
etc.