Preséntase a 6ª edición de Audiovisual nas aulas, este ano con novidades tecnolóxicas
martes, 3 de febreiro do 2009
A Consellaría
de Educación e Ordenación Universitaria vén de presentar a sexta edición do
seu programa Audiovisual nas aulas,
un proxecto no que participan 40 centros de infantil, primaria e secundaria, e
que ten por obxectivo achegarlle os medios audiovisuais ao alumnado galego para
poñelos ao servizo da súa “reflexión,
creación e imaxinación”.
Laura Sánchez Piñón, a conselleira de
Educación, aproveitou o acto de presentación para apuntar que “os medios audiovisuais reflicten un novo
xeito de ver e entender o mundo” e destacou a importancia do programa Audiovisual nas aulas como unha
iniciativa “pioneira” que procura
achegar a linguaxe de imaxes ao ensino de xeito ameno e efectivo.
Este programa, promovido pola Consellería de
Educación e Ordenación Universitaria, a Secretaría Xeral de Comunicación e o
Consorcio Audiovisual de Galicia, ten entre os seus fins dotar ao alumnado
dunha alfabetización audiovisual básica, fomentar o espírito crítico ante o
audiovisual, e achegar ao alumnado aos creadores e artífices do audiovisual
galego. Desde o seu inicio, teñen participado no mesmo 265 centros de ensino de
Galicia e 8.225 alumnos e alumnas.
Este ano, Audiovisual nas Aulas 2009 inclúe
actividades xa realizadas en anos anteriores como Iniciación
ao Audiovisual, Iniciación á Animación, Iniciación á Televisión e Iniciación ás Novas Tecnoloxías e
inclúe, como novidade, a posta en marcha dunha nova fase do proxecto Dobraxe e Lingua.
Creación
de páxinas web e dunha grella de programación
Na parte de novas tecnoloxías, e tamén como
novidade, os alumnos levarán a cabo unha actividade que terá por obxecto
ensinar o funcionamento das novas tecnoloxías a través da creación dunha páxina
web. Así, os centros educativos terán un espazo nun dominio previamente
rexistrado, onde os alumnos deberán construír a súa propia páxina web empregando
todo tipo de soportes tecnolóxicos. A idea é aproveitar calquera medio útil
dispoñible (teléfonos móbiles, cámaras dixitais, software libre...).
Pola súa banda, na fase de iniciación á
televisión, os centros participantes gravarán entre todos unha grella de
programación, na que se amosen varios xéneros televisivos. Deste xeito, cada
centro de ensino realizará a gravación dun tipo de programa específico, para
acadar así unha programación variada.