PortalProgramas convoca aos internautas para darlle forma un exhaustivo informe sobre o software libre
venres, 4 de novembro do 2011
O PortalProgramas.com, do que falamos o ano
pasado para dar conta do seu apoio ao software libre, está a convocar estes
días á comunidade internauta para participar nun estudo dirixido a pór de
manifesto a visión que se ten en España das vantaxes deste tipo de programas
libres. O
estudo, chamado Valoración do
software libre na sociedade (2011), apóiase nunha enquisa con diversas
cuestións acerca da natureza e do potencial da programación aberta (que é?, por
que se usa?, ten calidade?, é seguro?) dispoñíbel xa para participarmos nela. O
informe, que será máis definitivo canta máis xente poña o seu gran de area, estará
logo a total disposición da comunidade.
Por certo que para a súa elaboración e para ir
conseguindo o meirande alcance, o portal conta este ano cun panel de expertos
que colaboran dando a súa visión sobre temas clave actuais de software libre a
nivel de usuario doméstico. Asemade, disporase dunha serie de axentes de apoio
que contribúan á difusión da enquisa co obxectivo de acadar a meirande
cantidade de participantes na enquisa.
A xuízo de Portalprogramas.com, o cuestionario
e o informe resultante resultan máis necesarios ca nunca, xa que se conta con
moita información de uso e satisfacción do software libre a nivel empresarial e
gobernamental, pero non se ten apenas información a nivel de cidadáns. “O informe sacará á luz a realidade deste
tipo de programas”, sinálase, “a visión
dos usuarios, o seu nivel de satisfacción e os atrancos e obstáculos que lles
atopan”.
Cos datos que se obteñan traballarase con
maior coñecemento na mellora e solución de tódolos posíbeis problemas que
aparezan, co que se estará tamén contribuíndo a unha meirande difusión dos
programas libres entre a nosa sociedade. A metodoloxía a seguir, que aparece
detallada nas bases do informe, sería a que citamos a continuación, en clave
resumida:
· Para que a mostra sexa ampla e heteroxénea cóntase
con ducias de medios de comunicación colaboradores.
· Para extraer as conclusións disponse da
participación de Gather Studios, unha firma independente de análises estatísticas.