Política Lingüística volverá premiar a mellor publicidade en galego na Internet
martes, 31 de xullo do 2018
Onte
presentouse en Santiago a 25 edición dos galardóns autonómicos que
distinguen, visualizan e reivindican o talento das nosas e os nosos
profesionais do eido da publicidade e a aposta do sector económico pola nosa
lingua. Os
XXV Premios de Publicidade en Galego foron dados a coñecer polo
secretario xeral de Política Lingüística, Valentín García, o
presidente do Foro Enrique Peinador, Xosé González, e máis o
presidente do Parlamento, Miguel Ángel Santalices. Segundo
fixeron saber incorporan unha categoría extraordinaria que
recoñecerá proxectos elaborados por alumnado de centros educativos.
O resto das modalidades son: radio, televisión, Internet e prensa
escrita.
Estes
premios recoñecen “accións publicitarias difundidas ou
transmitidas integramente en galego entre o 1 de xaneiro e o 31 de
decembro de 2017”. O prazo de inscrición fica aberto até o 11 de
outubro de 2018 e os galardóns entregaranse en novembro deste ano,
coincidindo coa celebración da galeguidade empresarial e as bases e
toda a información xa están dispoñíbeis no Portal da Lingua
Galega (www.lingua.gal).
Nas
categorías de radio, televisión, Internet e prensa escrita
establécense dúas modalidades de premio: para a empresa anunciante
e para a axencia de publicidade autora do anuncio. O premio
extraordinario busca recoñecer os traballos realizados polo alumnado
dos centros educativos especializados nalgunha das áreas de
coñecemento que teñan que ver coa publicidade durante o curso
2017-2018.
Ata
o ano 2016 os Premios de Publicidade en Galego viñan sendo
convocados polo Consello Asesor de RTVE-G e da Corporación da RTVG,
agora disolto. Desde 2017, son convocados pola Secretaría Xeral de
Política Lingüística da Xunta, coa colaboración do Parlamento de
Galicia e do Foro Enrique Peinador.
Na
pasada edición resultaron gañadores, na categoría de televisión,
o traballo Imposible sen ti, da axencia Tex 45 Producións
SLU, por encargo de ABANCA. O premio da categoría de radio foi para
o anuncio Medo a quedar sen datos, da axencia Bap&Conde,
para R. Na categoría Internet resultou galardoado A túa compra,
os teus temazos, da axencia de mercadotecnia dixital Nasas,
elaborado para GADISA. O xurado declarou deserto o premio á
categoría de prensa escrita porque o traballo presentado non se
axustaba ás bases da convocatoria.