Poderanse empregar dispositivos electrónicos durante todas as fases dos voos

Na actualidade a Axencia Europea de Seguridade Aérea (EASA) permite o uso de dispositivos electrónicos persoais (tablets, smartphones, eReaders ou reprodutores multimedia) durante os voos (sempre que estean no coñecido como modo avión, ou sexa, sen establecer comunicacións de telefonía móbil), pero non durante as manobras de despegue e aterraxe, limitación que vai suprimirse a finais do presente mes, manténdose só tal limitación no caso de dispositivos de grande tamaños, como ordenadores portátiles, que deberán gardarse durante as manobras por motivos de seguridade.
Esta decisión da EASA responde á demanda dos usuarios de facer uso dos seus dispositivos electrónicos mentres viaxan en avión, especialmente porque non hai evidencias de que os dispositivos electrónicos persoais afecten á seguridade aérea de ningún xeito, de aí que poderán empregarse durante todas as fases do voo.
E a cousa non remata aí, senón que a EASA incluso admite que está a explorar métodos que permitan que durante as viaxes sexa posible facer uso da telefonía móbil.
De todos os xeitos, dende a EASA insisten na necesidade de que os pasaxeiros atendan ás instrucións de seguridade que reciben ao inicio de cada voo.