Play-Doc amosará unha vez máis o mellor cinema documental do ano
venres, 8 de marzo do 2013
Finalmente, e malia a que
está caendo (non por falta de interese dos organizadores de calquera
actividade cultural galega, senón por falta de axuda) presentouse
unha nova edición do certame Play-Doc,
o festival de documentais de Tui, un dos máis prestixiosos e
senlleiros do noso panorama cinematográfico e
que recentemente pasou por esta web para pór de manifesto que
hoxe en día hai unha ampla comunidade de internautas para axudarnos
a facer o que á maneira tradicional vai camiño de ser impensábel:
financiármonos. Como lembraremos, os responsábeis de Play-Doc
botaron man das metodoloxías do crowdfounding para a
recadación de fondos orzamentarios. Ben, o caso é que finalmente
habemus festival, e é motivo de celebración. Este xoves
presentouse a nova edición, a novena, que se vai celebrar en Tui do
13 ao 17 de marzo. A inauguración terá lugar o mércores 13 ás
20.30 horas no Teatro Municipal.
A presentación deste
evento correu a cargo dos directores do festival, Sara García e
Ángel Sánchez, xunto ao secretario xeral de Cultura, Anxo Lorenzo,
o alcalde de Tui, Moisés Rodríguez e a concelleira de Cultura de
Tui, Vanesa Rodríguez. Haberá, entre outras moitas cousas,
múltiples ocos para dar conta do mellor cinema documental do ano,
xunto a ciclos de grandes directores, como por exemplo Albert Maysles
e Nicolás Guillén Landrián. Segundo fixeron saber os organizadores
de Play-Doc, esta será sen dúbida unha das mellores edicións, unha
edición na que cristaliza finalmente o labor despregado ao longo de
case unha década, dando o mellor de si. Nisto terá moito que ver a
presenza de directores senlleiros como os devanditos pero tamén o
“intre óptimo que vive o documental galego con repercusión
internacional”. Para Ángel Sánchez, nada hai no feito de
tratarse dun certame feito dende Tui que repercuta negativamente na
súa calidade e lonxitude de alcance. “Para nós”, dixo,
“a periferia é un valor engadido” que impacta en cada un
dos convidados de Play-Doc.
Sara e Ángel agradeceron
o apoio das institucións e entidades privadas pero tamén dos
colaboradores individuais e anónimos como son os Play-Doc Support
que “máis aló do impacto económico, o que importa é o
impacto moral que supón que haxa tanta xente detrás do festival que
o quere apoiar directamente”. Os
Play-Doc Support, precisamente, foron os internautas que contribuíron
a financiar o evento a través da dita campaña
de recadación de fondos e
facendo uso da metodoloxía de crowdfounding
(mobilización de pequenos produtores-internautas).
Aludiron tamén á
visibilidade que se lle dá ao audiovisual galego tanto durante o
festival, cos contactos que se fixeron nas distintas edicións, pero
tamén nas actividades que Play-Doc realizou ao longo do ano tratando
de propor programación con documental galego fóra das nosas
fronteiras porque “cremos profundamente no talento que hai en
Galicia”.