Os Tamagotchi volven en versión móbil

Bandai Namco anuncia que por fin está dispoñible en case todo o mundo My Tamagotchi Forever, un xogo móbil que podemos descargar de balde para iOS e para Android, recuperando o clásico xogo de peto que fora todo un fenómeno hai un par de décadas, e que agora volven para captar a unha nova xeración de afeccionados.
A nova aplicación non só pode xogarse de balde, senón que tamén inclúe novidades interesantes como a posibilidade de gozar de realidade aumentada en iOS e Android facendo uso das tecnoloxías ARKit e ARCore respectivamente (en dispositivos compatibles coas mencionadas tecnoloxías), para así poder explorar Tamatown e buscar aos nosos outros amigos Tamagotchi.
O novo xogo permite crear o noso propio Tamagotchi, que teremos que coidar para que estea san e feliz, de xeito que o usuario terá que alimentalo, limpalo, entretelo e incluso mandalo a durmir. My Tamagotchi Forever inclúe minixogos, permite que os personaxes Tamagotchi vian evolucionando en función dos coidados recibidos, conta con numerosos elementos desbloqueables e incluos permite compartir os momentos favoritos e os progresos cos amigos.
Aínda que é posible xogar completamente de balde, a aplicación integra compras, de xeito que no caso de non querer realizar gastos accidentais os editores do xogo recomendan desactivar esta posibilidade no dispositivo no que estea instalado.