O software libre está presente na práctica totalidade das universidades españolas
mércores, 10 de marzo do 2010
CENATIC (o Centro Nacional de
Referencia de Aplicación das TIC baseadas en fontes abertas), vén de presentar
en Madrid o seu Estudo sobre a situación
actual do software de fontes abertas nas Universidades españolas e Centros de
I+D españois, un informe (o primeiro destas características) que
incorpora información cualitativa e cuantitativa sobre o estado da implantación
e uso das tecnoloxías libres no nundo académico e investigador en España, e as
conclusións son moi positivas para todo o sector.
Esta entidade pública, que elaborou
o informe a través do Observatorio Nacional do Software de Fontes Abertas
(ONSFA) en colaboración co grupo Libresoft da Universidade Rey Juan Carlos de
Madrid, entre outros, inclúe os resultados dunha enquisa sobre o uso de fontes
abertas na universidade, así como o estudo de 25 casos de implantación,
desenvolvemento e promoción de tecnoloxías libres, e unha selección de 20
proxectos I+D en torno ao software de fontes abertas financiados por programas
de ámbito estatas e europeo.
Os resultados do estudo inclúen
información estratéxica de utilidade para os responsables da toma de decisións tecnolóxicas,
e segundo informan dende o propio Centro, “axuda
a comprender os beneficios que o software libre aporta en tódolos ámbitos”.
O informe, presentado hoxe mesmo durante a III Asemblea de Morfeo desenvolvida na
capital, reflicte que o software de fontes abertas está presente na práctica
totalidade das Universidades e Centros de I+D españois. De feito, no caso das
Universidades, baséanse en software libre o 60 por cento dos seus servidores, o
42 por cento das súas bases de datos, o 67 por cento do seu correo
institucional, o 87 por cento das súas ferramentas de xestión de contidos, o 67
por cento dos seus sistemas antispam, o 40 por cento dos seus campus virtuais, ou o 44
por cento das súas solucións de administración electrónica.
Por outro lado, o estudo tamén reflicte que o 83 por cento das universidades
contan con algún grupo de investigación sobre este tipo de software, que buscan
asemade a transferencia tecnolóxica das súas ferramentas á industria. No 57 por
cento das universidades existen ademais asociacións de usuarios de apoio ás
tecnoloxías libres, e no 90 por cento das mesmas impartíronse materias
relacionadas coas tecnoloxías abertas. A publicación dos resultados da I+D
baixo licenzas libres é outro dos resultados máis visibles do uso de metodoloxías
baseadas na cultura do software libre.