O software libre como recurso de e-inclusión será o eixe da xornada do xoves no Centro Demostrador
luns, 16 de xullo do 2012
O Centro Demostrador TIC de
Santiago segue este verán visibilizando as vantaxes das tecnoloxías
para o noso día a día, ben sexa a nivel persoal, coletivo,
empresarial ou institucional. Este xoves 19, sen ir máis lonxe,
falarase arreo de vantaxes sociais e de igualdade: as
dos programas de código aberto no ámbito das persoas maiores,
dependentes e con diversidades funcionais ou motrices. Trátase da
xornada demostradora Oportunidades na accesibilidade con Software
Libre, organizada co
obxectivo de facer un percorrido por solucións tecnolóxicas de
accesibilidade con licenza libre dirixidas, precisamente, a facilitar
o acceso ás tecnoloxías e á información. Contarase coas achegas
de empresas-entidades galegas como Igalia, Wireles Galicia e
Gradiant. Tamén haberá espazo para falar polo miúdo do Proxecto
Abalar.
A sesión
vai dirixida á profesionais de diversos ámbitos de actividade
(educación, socio-asistencial, asociacións, fundacións...) que
traballan con ou para persoas con diversidade funcional. A asistencia
é de balde, condicionada ao aforo do local e
previa inscrición en liña a través do portal web do Centro
Demostrador TIC.
A
xornada, que se celebra de 10:00 a 14:00, comeza co relatorio
Accesibilidade
no entorno de escritorio GNOME,
presentado por Alejandro Piñeiro, coordinador do Equipo de
Accesibilidade de Igalia e coordinador do GNOME Accesibility Team da
GNOME Foundation. A continuación, Juana Fernández, asesora
SIEGA-ABALAR exporá as posibilidades do Software
Libre na Educación,
acompañada de Rosa María Garrido e Juan Carlos Buño, instrutores
de Tiflotecnoloxía e Braille da Once, que compartirán a súa
experiencia no uso de tecnoloxías con licenza libre con persoas con
discapacidade visual.
Rematará
o evento a presentación de Tecnoloxías
Libres para interacción multimodal de usuarios con diversidade
funcional a
cargo de Iván
Pozuelo, xestor de proxectos de Wireless Galicia, Esteban Vázquez,
investigador de Gradiant e Antonio Cardenal, doutor en
Telecomunicacións do Grupo de Tecnoloxías Multimedia da
Universidade de Vigo. Todos eles membros do proxecto INTERACCE, cuxo
obxectivo é a procura de interfaces de usuario que faciliten a
interacción home-máquina, facéndoas máis usables e intuitivas,
especialmente importante para o colectivo obxectivo da xornada. Esta,
por certo, vén da man da Axencia para a Modernización Tecnolóxica
de Galicia, AMTEGA, a través da Área de Sociedade Dixital, que ten,
como un dos seus obxectivos estratéxicos, o fomento e integración
das novas tecnoloxías en todas as capas da poboación.