O rural asturiano estréase na banda larga por fibra óptica

No pasado mes de marzo Alcatel finalizou as obras de espallamento dunha rede de fibra óptica en 21 localidades asturianas das comarcas do Nalón, o Caudal e o suroccidente de Asturias cun total de 220 quilómetros de cable, achegándose ó resto de zonas rurais nas que o cable non é viable mediante satélite ou LMDS creando así a infraestrutura que se dá en chamar Astrucón, e que comezará a explotarse comercialmente pola empresa Adamo, de xeito que os privilexiados en ter conexión a esta rede poden contratar conexións de ata 100 Mbps de baixada e 20 Mbps de subida por só 29 euros/mes (cunha cota de alta de 35 euros) ou de 100 Mbps simétricos por 49 euros/mes.

As conexións domésticas mediante tecnoloxía FTTH inclúen contas de correo electrónico ilimitadas (cunha capacidade de 2 Gb), un almacenamento de datos seguro de 1 Gb e 5 enderezos IP dinámicos. A oferta tamén se pode combinar cunha tarifa plana de chamadas a teléfonos fixos de toda España por 9 euros adicionais.
A nova plataforma tamén comercializará televisión nos vindeiros meses, estando traballando nun servizo televisivo baseado en IP preparado para a alta definición.
O servizo aínda está en probas, amosándose unha grande satisfacción por parte dos usuarios actuais, distribuídos na seguintes poboacións: Tineo, Cangas del Narcea, Tuilla, Blimea, El Entrego, Sotrondio, Rioturbio, Pola de Lena, Santa Cruz, Figaredo, Turón e Ujo. A finais de setembro se incorporarán a esta rede Pola de Laviana e Barredos, e antes de rematar o ano terán servizo Villanueva, Caborana, Moreda, Oyanco, Cabañaquinta, Felechosa e Santa Eulalia de Morcín.