O premio Nobel de Física, Eric A. Cornell, imparte mañá un relatorio sobre a entropía en Compostela
luns, 16 de setembro do 2013
- Cornell posando a carón da catedral nunha fotografía de Santi Alvite
O programa
ConCiencia da Universidade de Santiago de Compostela cotará este martes coa
presenza do científico Eric A. Cornell, galardoado co Nobel de Física aos 39
anos de idade e que participará neste programa de divulgación científica
dirixido polo profesor Jorge Mira.
A xornada de mañá comezará cunha recepción ás 10:00 en San Xerome por parte do
reitor Juan Casares e na que Cornell asinará no Libro de Honra da Universidade,
para trasladarse ás 12:00 á Aula Magna da Facultade de Óptica e Optometría para
manter un encontro con persoal científico do grupo de Fotónica da USC, no que
comentará “por que o cristal quente é máis pegañento que o frío”.
- Jorge Mira presentou aos medios de comunicación a Eric A. Cornell (Fotografía de Santi Alvite)
Xa pola tarde, e para o público xeral, Eric A. Cornell impartirá un relatorio
titulado Folgazán vs. Descoidado: a
historia épica da enerxía, entropía, temperatura, o último destino do universo
e o rol do sobrenatural no auditorio de Nova Caixagalicia Banco (no número
22 da rúa Preguntoiro). Esta actividade que comeza ás 20:00 horas tentará
explicar a segunda lei da termodinámica.
O estadounidense Eric Allin Cornell conseguiu o premio Nobel en 2001 por acadar
condensación de Bose-Einstein (estado da materia predito nos anos 20 por
Satyendra Nath Bose e Albert Einstein) en gases diluídos de átomos alcalinos e
polos primeiros estudos fundamentais das propiedades de ditos condensados. Este
estudo pechou unha busca de 70 anos no mundo da física e marcou un antes e un
despois na disciplina, á vez que espérase que sexa unha importante contribucíión ao ámbito das TIC.