O director do IGAPE destaca a importancia da dixitalización na competitividade das PEME galegas

Os directores do IGAPE, Juan Cividanes, e da AMTEGA, Mar Pereira, inauguraron esta mañá a segunda xornada do DICO Summit 2017 que se desenvolveu no edificio CINC da Cidade da Cultura. Ao abeiro da Axenda da Competitividade Galicia-Industria 4.0 que está a desenvolver a Xunta, Cividanes salientou a importancia dos avances na dixitalización para asegurar e consolidar melloras para que as PEME galegas sexan máis competitivas. Manifestou que sen dixitalización será practicamente imposible asegurar o futuro das empresas e engadiu que un dos retos está en rachar a barreira co mundo en liña, apostando por unha conectividade permanente entre as empresas e os clientes para os que fabrican produtos ou deseñan servizos.
O director do IGAPE salientou que a Consellería de Economía, Emprego e Industria está a prestar atención preferente aos novos modelos de negocio, especialmente a través de instrumentos como o fondo de capital risco Galicia Iniciativas Emprendedores (FGIE) creado no marco da Lei de Emprendemento. De feito, afirmou que a maioría dos proxectos aprobados neste ámbito, máis de 40, están relacionados coa dixitalización.
Cividanes destacou a importancia de eventos como DICO Summit para que as empresas galegas estean preparadas para tirar proveito das novas oportunidades ligadas directamente á dixitalización; ao tempo que engadiu que ese é tamén o obxectivo dos servizos avanzados que achega a Xunta ás empresas galegas a través de programas como ReAcciona TIC, impulsado conxuntamente polo IGAPE e a AMTEGA.