O asistente de conversa CELIA de atlanTTic chega a WhatsApp para combater a soidade non desexada
mércores, 13 de decembro do 2023
O
Centro de Investigación en Tecnoloxías de Telecomunicación da
Universidade de Vigo, atlanTTic, desenvolveu o asistente de conversa,
CELIA,
para combater a soidade non desexada entre as persoas de idade
avanzada e detectar de forma precoz enfermidades cognitivas
neurodexenerativas. A ferramenta CELIA xa está dispoñíbel de forma
gratuíta a través de WhatsApp para todas aquelas persoas que
queiran empezar a probala.
O
proxecto liderado por Francisco Javier González Castaño, busca dar
resposta a dúas dos retos máis complexos que afronta a sociedade
actual. Como explica o director de CELIA, Pablo Campos, “trátase
dun proxecto innovador de Intelixencia Artificial co que mellorar a
calidade de vida das persoas de idades avanzadas en varios contextos,
o emocional e o sanitario”.
Segundo
os datos do INE, en España hai un total de 9,7 millóns de persoas
maiores de 65 anos, e as previsións sinalan que nas próximas
décadas ascenderá ata os 15 millóns. Destas persoas, actualmente
máis de 2 millóns viven soas, e esta cifra crecerá ata os 7
millóns en 20 anos. Por outra banda, o centro atlanTTic lembra que
na actualidade non existen mecanismos efectivos de detección temperá
para enfermidades cognitivas como o alzhéimer ou a demencia. Con
todo, comprobouse que o tratamento en etapas iniciais pode axudar a
atrasar a súa progresión e a mellorar a calidade de vida destes
pacientes.
Ante
este contexto, un equipo de atlanTTic traballa desde hai cinco anos
para dar resposta a ambos os retos. Da valorización destes
traballos, nace CELIA, que sería en palabras do centro vigués “o
primeiro asistente de conversación que permite o uso da voz e pon a
IA ao servizo das persoas”.
O
asistente foi deseñado para acompañar, conversar e entreter con
empatía a persoas de idade avanzada, ao mesmo tempo que monitora a
saúde cognitiva dos seus usuarios a través da análise da linguaxe
e a voz. Neste sentido, comprobouse que a voz é unha ferramenta
biométrica cuxos parámetros permiten monitorar enfermidades
neurolóxicas, emocionais ou cardio-respiratorias, polo que no futuro
ampliarase o número de enfermidades a controlar mediante estas
ferramentas de IA
CELIA,
un asistente único no mercado
O
centro da UVigo engade que “a gran diferenza de CELIA con outros
asistentes de conversa é que ten iniciativa e comunícase cos seus
usuarios sen esperar unha orde. Isto xera empatía nas persoas de
idade avanzada e, por iso, o 75% dos que o usaron durante o período
de proba solicitaron seguir usando CELIA”.
CELIA
é totalmente gratuíta e pódese acceder a través da web
Celiatecuida.com ou agregando
o contacto do 655 64 14 45 por teléfono para iniciar unha
conversación en WhatsApp. O proxecto, ademais, ten diferentes
módulos personalizables de conversación centrados en adiviñas,
lecturas de prensa, preguntas familiares, etc.