O Mundial de Fútbol bate records de streaming nos EE.UU.

Aínda que EE.UU. non é un país onde o fútbol europeo teña a entidade do béisbol ou o fútbol americano, o actualmente Mundial de Fútbol parece estar a facer historia na Rede, amosando o cambio de tendencias no consumo audiovisual, pois o encontro entre EE.UU. e Alemaña, tras experimentar algúns problemas na súa retransmisión durante a primeira parte, conseguiu superar os 1,7 millóns de usuarios simultáneos a través do servizo de streaming de ESPN (só dispoñible para usuarios de pagamento), superando amplamente os 1,1 millóns de usuarios simultáneos do encontro entre os Broncos e os Seahawks na Super Bowl.
Cómpre destacar que á marca acadada polo Mundial de Fútbol pode xustificarse especialmente por 2 factores: o horario (pola tarde, en lugar de pola noite, unha hora á que é habitual estar afastado dun televisor) e a oferta do streaming para dispositivos móbiles (non dispoñible no caso da Super Bowl).
Dende Univision tamén están a transmitir o Mundial, e aseguran estar a rachar marcas constantemente, xa que hai 10 días conseguiran chegar aos 630.000 espectadores simultáneos por streaming durante o partido Brasil-México, e co encontro EE.UU.-Alemaña chegaron aos 750.000, polo que poderiamos sumar esta cantidade á de ESPN e teriamos que nos EE.UU. o seguimento por streaming do partido de fútbol foi duns 2,45 millóns de espectadores, o que é un volume impresionante, aínda que lonxe dos máis de 8 millóns de usuarios que seguiron á vez o salto de Felix Baumgartner.