O Foro TecnoETIS reúne hoxe a estudantes de Santiago e a dez empresas tecnolóxicas

Hoxe ás 11.00 dá comezo no salón de actos da Escola Técnica Superior de Enxeñería da Universidade de Santiago un encontro encamiñado a minimizar (e, a poder ser, suprimir) os atrancos que afastan dous eidos que deberían camiñar xuntos: o eido empresarial e o eido educativo, concretamente o universitario. A xuntanza, chamada “Foro TecnoETIS”, achegará actividades e canles de comunicación entre estudantes de Enxeñería Técnica en Informática de Sistemas da USC e representantes de empresas do sector das TIC.
Segundo informan os responsables do foro, entre as participantes atópanse dez firmas a día hoxe “implicadas” no programa de prácticas de titulacións: Altia, Bahía Software, Balidea, Cinfo, Coremain, ECISA, IT-Deusto, Level Telecom e Tecnocom.
A sesión insírese na recentemente creada Aula Profesional ETSE na que teñen cabida actividades encamiñadas a poñer en comunicación o mundo profesional e os estudantes a través do desenvolvemento de xornadas, seminarios técnicos, conferencias ou visitas técnicas, entre outras actividades. Desta volta, o Foro TecnoETIS coordínano os profesores da titulación José Á. Taboada González e José M. Cotos Yáñez.