O Concello da Coruña achega aos cidadáns un mapa innovador coas empresas da súa contorna

Este martes o Concello da Coruña presentou o Mapa de Innovación dos Recursos Empresariais (MIRE), unha ferramenta de dinamización empresarial dirixida a facilitar que as empresas e os veciños poidan consultar a cartografía da innovación do tecido produtivo da cidade e a súa área metropolitana. A ferramenta foi desenvolvida pola Universidade da Coruña coa colaboración do Concello e pode consultarse desde computadores e dispositivos Android.
MIRE ofrece información xeolocalizada, sobre empresas, persoas de contacto, a súa presenza en redes sociais, a súa situación empresarial e as súas perspectivas de futuro. A ferramenta amosa amplo potencial, tamén, como recurso para a busca e emprego.
Arestora o mapa abrangue 5.489 empresas de carácter tecnolóxico, da Coruña, Abegondo, Arteixo, Bergondo, Betanzos, Cambre, Carral, Culleredo, Oleiros e Sada. A información está dispoñíbel na web www.coruna.es/mire e pode ser descargada “para un tratamento personalizado”, sinalaron o Concello e máis a Universidade.